Verstappen-a'n hmun dang a hawi lo

Max Verstappen leh Red Bull inkarah sawi neuh neuh a awm fo a, zawhna pawh a tam - mah se Dutch driver hian season tharah chuan team dang zawm tumna a nei lem lo tih a sawi.

Red Bull leh Verstappen te hian kum 2028 thleng daih contract an nei mek, khawel car intlansiakna sang berah hian a hlawh tam ber niin team dang tan pawh ani sawm lut tur chuan sum hman huai a ngai hle ang.

Kum 26 mi Verstappen chuan, "Tun hma pawhin zawhna ka dawng fo a, a chhan chu a pangngai a ni. Season tharah Red Bull ni lo team dang neih tumna ka nei lem lo, contract nei lai ka nih avangin ka hma hun hi a pawimawh ber a ni rih lo.

"Tun dinhmunah chuan engtin nge car ṭha lehzual zawk kan neih ang a, team thawhhona ṭha zawk kan neih theih ang tih a ni zawk, tun season mai bakah season thara hmalak dan tur kan duang lawk tawh zawk a ni," a ti.

Red Bull leh Max-a ten chanchin lawmawm lo lam an neih khan Mercedes chu an lo lang nghal a, anni hian Lewis Hamilton an chhuahtir dawn a, an duh a nih phawt chuan sum tam takin Verstappen hi an sawm thei ngei ang.

Formula 1 season kal laiah Verstappen hian amah hnaih bertu Lando Norris lakah hma a hruai fal leh ta hle, a zawna a vawi li nan a champion ngei pawh a rinawm. Pathianni zan dar 6:30 hian Red Bull Ring-ah Austrian Grand Prix an tlan leh dawn a ni.