T20 World Cup-ah India hun a inher chhuak leh ta
India-in kum 17 hnuah T20 Cricket World Cup nomawi an chawi leh ta a, Inrinni zan khan final hmuhnawm bikah South Africa chu run sarihin an hneh. Men in Blue chak theih nan captain Rohit Sharma thutlukna a pawimawh a, Virat Kohli leh Jasprit Bumrah ten a hunah tak an theihna sang tak a rawn lantir a, India tan chanchin duhawm hlir a ni.
Men in Blue hi chak lo thei dinhmuna an din laiin Suryakumar Yadav-a'n David Miller-a six runs ni thei tur chu a man. SKY hian ball ringawt ni loin trophy a man tel a tih theih a, cricket history chanchin ngaihnawm zingah a chuang tel reng tawh ang.
Kensington Oval Barbados-ah India-in nomawi an chawi takah chuan coach Rahul Dravid-a'n hming ṭha takin India coach hna a chawlhsan dawn a, Rohit leh Kohli ten nomawi nen T20 cricket an mangṭha bawk.
King Kohli
India captain hlui Virat Kohli hi semifinal thleng khan a la che ṭha lo a, Kohli chu ni lo se an thlak tawh ngei ang. Mahse, Rohit-a'n Kohli theihna hrechiangin match sariha 75 runs chauh siamtu chungah rinna a nghat tlat.
Men in Blue captain hian bat hmasak a thlang a, mah se amah ber hian ruk kua chiah a siam a, Rishabh Pant (0) leh Suryakumar Yadav (3) ten run tam an siam lo–wicket thum an hlohin 34 runs chauh an la siam.
India-in chhantu a mamawh a, mamawh chhanna chu Kohli a ni a, player thiam bik Kohli hian ball 59-ah 76 runs siamin dinhmun ṭhaah Men in Blue a dah. Axar Patel (47) leh Shivam Dube (27) te zarah India-in 176/7 runs an siam thei a, chakpui theih a ni.
Thinphu a rang
Thla riat liam ta khan Ahmedabad-ah mipui sing kua an pungkhawm a, ODI World Cup-ah India-in nomawi chawi inbeisei mah se Australia lakah an tlawm. Kum 2022 khan Adelaide-ah England-in an sawp tawh a, kum 2019-ah Manchester ruahsur hnuaiah New Zealand an ngam lo a, kum 2016-ah an mualah West Indies an hneh lo bawk.
MS Dhoni awm loh hnuah India-in champion dan an theihnghilh ta emaw tih mai tur a ni a, chutihrualin an khingpui South Africa hi la champion ngai lo an ni thung.
India-in Jasprit Bumrah leh Arshdeep Singh te hmangin wicket la hma mah se Quiton de Kock (39) leh Tristan Stubbs (31) te an che ṭha a, Proteas dinhmun a ṭha zawk. Heinrich Klassen-a'n ball 27-ah 57 runs a siam bawk avangin India ṭantute an indawm kun hman.
A tawpah ennawm
Rohit Sharma-a'n risk rawn lain over hnih chauh vawm thei tawh, Bumrah chu over 16-naah a rawn vawm tira, hei hi thil thlen dan danglam ṭanna a ni. Over 17-naah Hardik Pandya-a'n Klassen a vawm hlum ve chiah a, over 18-naah Bumrah-a'n wicket a lak bakah run hnih chiah a pe a, chak lo thei dinhmuna ding hman India dinhmun a ṭha ta zawk.
Chutihrualin South Africa tan ball 12-ah 20 runs siam a la ngai a, chak theihna kawng zau tak a inhawng. Arshdeep Singh a rawn che ṭha a, run li chauh a pe. Proteas tan over tawp berah 16 runs siam a ngai a, chutihrualin Bumrah leh Arshdeep ten an vawm thei tawh lo.
Hardik Pandya a rawn pen chhuak a, 16 runs mamawh South Africa lam tan David Miller-a'n risk rawn la nghalin ṭha zetin a rawn vua a, six ngei tura ngaih a ni. Mahse, SKY-a'n line bulah ball a man a, line a pelh dawn avangin ball chu vawr kang lehin, line pawn a rah hnuah line chhungah rawn tlan lut lehin a ball var kang chu a man–catch ropui bik hi India chak theih nan a pawimawh hle.
Proteas-in over tawp berah 16 runs mamawh mah se run riat chauh an siam a, chutihrualin Miller-a'n six runs vaw ta se chuan result a inthlak thei hial ang. Mahse, a tawpah rilru fim zawk India an vannei ta zawk a, run sariha hnehna changin an champion.