Indian football roreltu Mizo tlangval

Football Players’ Association of India (FPAI) chuan kum tina an sem ṭhin Indian Football Awards an sem chhuak leh ta a, June 29 Inrinni zan khan award hi puangin, lawmman ngaihhlut pahnih chu Mizo tlangval Lallianzuala Chhangte leh Isak Vanlalruatfela ten an dawng.

Men's Player of the Year atan Lallianzuala Chhangte chu thlan a ni a, a kum zawnin a dawng - Sunil Chhetri tih loha he award a zawna dawng thei hmasa ber a ni. Mumbai City-a kum thum dang cham tura contract ziak hlim LZa chuan, "Pathian malsawmna leh awmpuina liau liau a ni.

"ISL champion kan nih avangin award dawn hi chu ka inring ve deuh a, mahse, season laihawl velah kha chuan ka beidawng ve hman hle. Pathian min hruaina vang a ni a, hnual ve rawk theih chang awm mah se, hmasawn tura ka lo beih ve hram hramna khan a hunah tak rah duhawm a lo chhuah ṭhin a ni," tiin Vanglaini a hrilh.

AIFF Player of the Year ni lai Lianzuala hian season hman zawh takah khan inelna hrang hrangah Mumbai City tan match 34 khelin goal 11 a khung a, assist vawi sarih a nei. ISL bikah match 25 khela goal 10 khungin, assist vawi ruk a nei a, Indian player zingah ISL-ah season zawna goal 10 aia tam khung thei hmasa ber a ni.

Odisha forward Isak-a'n season hman zawh takah inelna hrang hrangah match 36 khela goal sarih khungin, assist vawi li a nei a, ISL-a player hmuhnawm ber pawl a ni. ISL bikah hian match 24 khela goal li khungin, assist vawi thum a nei.

Isak-a chuan, "Ka beisei phak loh award ropui tak mai ka dawng hi ka lawm takzet a, Pathian malsawmna a ni. Tin, a Mizo ang pawha keipawhin ka ngaihsan leh, Indian footballer zinga ka el ber, ka senior leh ka ṭhianpa ni bawk LZa nen award kan dawng dun thei hi ka lawm hle. Hmabak tam tak ka la nei a, he award hian phurna leh chona thar tam tak min pe a ni," tiin Vanglaini a hrilh.

Thingsulthliah/Bawngkawn tlangval chuan sawi zawmin, "Hetiang ang award ka dawn ve theih chhan hi chu Pathian, ka chhungte leh kohhran mite ṭawngṭaipuina zar a ni. A tawp berah chuan kan thlen ang thleng a, lo kal ve zel turin ka Mizo ṭhalaipuite ka duhsak hle.

"A pawimawh ber erawh, Matthaia 6:33-a "A ram leh a felna chu zawng hmasa zawk rawh u; Tichuan, chung zawng zawng chu a pek belhchhah dawn che u nia," tih hi a ni a, he thu hre reng chung hian Mizoram tihmingṭha tura inbuatsaih zel turin ka chah ve duh a ni," a ti.