Ronaldo leh Portugal tan thawh leh hun

Cristiano Ronaldo awmna Portugal chuan zanin dar 12:30 hian Slovenia an hmachhawn dawn - European Championship hi last 16 a ni tawh a, chak loh chuan puanthuah tela Germany chhuahsan a ngai dawn tawh a ni.

Roberto Martinez-a leh a naute hian an group match hnuhnung berah Georgia an ngam lo, player ṭha tam zawk an chhawr lo a, captain Ronaldo a inlan avangin chanchinbu miten an sawi zui nasa - zaninah Ronaldo hian a chhanna pek ngei a tum ang.

Georgia an hneh loh ṭum hian defender Antonio Silva a che fuh lo hle, goal hnih an chhuah chhan niah a ngaih theih. Slovenia lakah erawh Pepe-a leh Ruben Dias te an inkawp leh thung tawh ang a, tlarhnung lai a phui leh deuh tawh tura ngaih a ni.

Bruno Fernandes leh Bernardo Silva ten mual lai an luah a nih chuan, Manchester United leh Manchester City midfielder khing zo tur hi Slovenia lamin an nei kher lo ang, ball chang tama inkhel tunun thei turin an ṭha tawk.

Portugal hian 2022 World Cup-a Morocco an hneh loh hnuah a zawnin inelna pangngaiah match 12 an chak zawn thei a, an record duhawm tak hi thaichhiat ni mah se thawh chhuah leh an tum dawn a, a tuar thei hnaivai ber chu Slovenia hi an ni.

Kum 39 mi Ronaldo-a'n Euro khelh laiah goal a la khung lo, mi ṭhenkhat chuan Ronaldo tel loin Portugal hi khel se an ṭha zawk ang em tih ngaihdan pawh an nei ta fo a, tuna a lan danah erawh Martinez-a'n Ronaldo hi a ringtawk a, zaninah pawh a khel ang.

Ronaldo hi a kum tam deuh tawh mah se tlarhma lamah a hnawksak - Rafael Leao leh Silva ten a sir lama hmun an neih theih nan player pawtkhawmtu a la ni ṭhin a, Euro khelh laia shot tam ber (12) a nih avangin goal-in a zui mai pawh a rinawm.

Slovenia hi team hriatthiam harsa angreng tak an ni - ball an chang tlem thei hle a, group match vawi thum an khelhah khan 32% possession chauh an nei a, ball chang tlem pathumna an ni. Mahse, England laka goal chhuah lo an nih miau avangin theihna an nei tih a chiang.

Goalkeeper ṭha Jan Oblak an nei, Ateltico Madrid duhlai hi si ban nghak turin a rintlak a, ani aia duh thlan tur dang hi ram dang pawhin an nei kher lo ang. Portugal lakah pawh an thlamuanpui leh hle tura ngaih a ni.

Tlarhmaah Benjamin Sesko an nei - RB Leipzig striker hian season duhawm a hmang zo chiah a, player ṭha a nih avangin Arsenal leh Chelsea te pawhin an hel ruk a ni a, mahse Bundesliga club tan contract a ziak thar leh dawn niin an sawi thung.

6ft 5in zeta sang forward Sesko hi boruakah a hlauhawm a, hei hi Portugal tana ven a ngaihna lai tur a ni thei ang. Pepe (6ft 2in) leh Dias (6ft 1in) te an fimkhur a ngai dawn a, coach Matjaz Kek-a'n ball kang a hmang nasa a nih pawhin a mak lo ang.

Ngaihnawm

▶ Portugal leh Slovenia te hi an inhmachhawn vawi hnihna tur chauh a ni a, kumin Match thla khan friendly match khelin Slovenia hi 2-0 in an chak.

▶ Slovenia hian major tournament bikah chuan a vawi khat nan knockout stage an lut ve chauh a ni a, an tam thil thar zel a ni dawn. Portugal erawhin major tournament knockout stage china an match 26-na a ni ang.

▶ Competitive match bikah Portugal chak tluang lai, match 12 an chak chu Georgia lakah a tawp a, kum 2008 Euro hnuah a zawna chak loh an la nei ngai lo.