Argentina hnung zuitu Canada
Copa America champion lai Argentina chuan Group A hmahruaitu ni chiang turin Peru 2-0 in an hneh a, an group aṭang hian Canada chuan quarterfinal an inhlangkai ve bawk a ni.
Nimin zing inkhelah Argentina tan Lionel Messi a inlan lo, captain Messi hian hliam tenau a neih bakah quarterfinal lut chiang tawh an nih avangin bench lamah hahchawlhtir a ni a, striker Lautaro Martinez chuan goal hnih a khung thung.
Inkhel dangah Canada leh Chole te goal lut lo 0-0 in an inhnehtawk a, Canada hian point li neiin world champion Argentina hnung an zui. Chile leh Peru te erawhin group stage paltlang zo loin inelna an mangṭha a ngai ta a ni.
Canada coach Jesse Marsch chuan, "Argentina khan goal an khung mai bik si lo a, midang inkhel ngaihchan tel a ngaih avang khan rilru a nuam lo hman hle. Goal an khung takah kha chuan keini tan pawh hna a awlsam phah ta deuh.
"Goal chhuah loa Chile nen kan inhnehtawk a nih kha chuan kan tlang dawn tih kha a chiang tawh a, chumi chu kan hlenchhuak thei," a ti. Chile hian kum 24 chhunga a vawi khat nan Copa America group stage an paltlang zo lo a ni.
Group hmahruaitu Argentina erawh an kaltluang hle - Chile, Peru leh Canada an hmachhawna goal khung vektu Martinez chuan, "Argentina jersey hak hi chu ka tan a hlu a, engkim hi a ni mai ṭhin. Ka khelhpuite chungah ka lawm takzet, anni vanga hetianga che fuh thei ka ni.
"A bik takin Leo chungah ka lawm, hun rei tak ram tana goal ka khung loh hnuah Copa America inbuatsaihna kan neih lai khan penalty min pet tir a, a hnuah a zawnin match thum goal ka khung ta," tiin a sawi.
Inrinni zing khan Barzil chuan an match hnihna an khel ve thung a, world champion vawi nga ni tawh hi insiamṭha in Paraguay chu 4-1 in an sawp, an lawmna tizual turin Vinícius Junior chuan goal hnih a khung.
Real Madrid star Vini bakah hian Savio leh Lucas Paqueta ten goal khat ve ve an khung bawk. Brazil hian Nilaini zingah an group match tawp ber atan Colombia an hmachhawn dawn, an chunga awm Colombia nen group hmahruaitu nih an inchuh dawn a ni.