Italy ngam loh Switzerland

Football inelnaah chuan Switzerland aiin Italy hming a lian zawk. Inrinni zanah erawh Switzerland an chungnung zawk a, Murat Yakin-a'n a naute chu football club-a player inman ṭha tak ang maiin a khelhchhuahtir thei a, Azzurri 2-0 in an hneh.

Olympiastadion Berlin-ah Switzerland tan Remo Freuler leh Ruben Vargas ten goal mawi an khung a, quarterfinal an lut. Rossocrociati hian quarterfinal-ah nizana England leh Slovakia inkhela chak zawk an hmachhawn ang.

Switzerland-in match hnuhnung ber aṭangin player pakhat chauh an thlak a, hrem vangin Silvan Widmer an chhawr theih lo. Luciano Spalletti erawhin player paruk ngawt a thlak. Hrem vangin Riccardo Calafiori a khel thei lo a, hliam vangin Federico Dimarco a khel thei lo - player pali dang chu tactical thil a ni thung.

Inkhel an ṭan a, Germany laka awmze nei taka khel thei Switzerland-in an tih tur an hre chiang. Italy lakah Switzerland-in ball an chang tam zawk a, inkhel an thunun hneh hle.

Breem Embolo-a'n chance ṭha bik a nei a, keeper Gianluigi Donnarumma ni lo se chuan goal-ah a lut ngei ang. Switzerland-in an khelh ṭhat rah an seng a, Ruben Vargas-a'n mual vei lamah changin Freuler-a tlan lut hmuin box chhung hmun ruakah ball a pe lut. Minute 37-naah Bologna midfielder hian ṭha zetin a volley lut a, Donnarumma tan dam ngaihna a awm lo.

Goal luh hnuah pawh Switzerland bawk an che ṭha a, Fabian Rieder freekick ṭha zet chu Donnarumma-a'n khawih perin goal ban a fuh hnuah goal pawnah a chhuak.

Italy-in halftime an hmang ṭha lo a, Switzerland bawkin bul a ṭan ṭha. Azzurri tlarhnung an muthlu a, Vargas-a'n inkhel ṭan aṭanga second 30 lekah mawi zetin a hlai lut. Switzerland-in 2-0 a hma an hruai hnuah goal venhim an ngai pawimawh a, Italy-in ball chang tam mah se Murat Yakin-a hoten harsatna an tawk lo.

Switzerland-in champion lai Italy an pet thla a, chak an phu tel bawk. Murat Yakin chuan, "Inkhel pawimawh takah hnehna kan chang a, inkhel kan thunun a, a hunah tak goal kan khung bawk. Thui tak kan thlir thei lo a, kan khelh hmabak zel kan ngaihtuah ang," tiin a sawi.