Beisei phak lo, champion tum pahnih France vs Belgium

European Championship 2024-ah France leh Belgium ten champion beiseiin Germany an pan a, mahse, tun thleng chuan team pahnih hian game hmuhnawm an pho chhuak lo - team pakhat zawk chu zaninah an tla dawn!

Euro 2024-a last 16 ngaihven hlawh ber tia chhal ngam chu zanin dar 9:30 hian khelh a ni dawn a, France leh Belgium an intawng dawn. An intawn hma hauhin boruak a 'hot' a, team pahnih an inhlau lo tawn hle - inkhel hmuhnawm a beisei ngam.

Red Devils defender Wout Faes chuan, "France kan hlau lo a, eng team pawh kan hneh thei," tiin a team a ringtawk viau a, France an ngawi mai mai bik lo.

France centre back William Saliba chuan, "Min hlau lo a nih pawhin a ṭha alawm - hnehna chang turin kan theihna zawng zawng kan hlan dawn a, min hmachhawn hi nuam an ti lo ang," a ti - khai le, zanin chu inkhel hmuhnawm en leh phawt mai ang u!

Goal khung harsat

Champion rin hlawh ber pawl ni chungin France-in Euro an hmachhawn a, mahse, an ropui rih lo - group D-ah pahnihna ni chungin last 16 an lut a, match thum an khelh aṭangin point nga an hmu a, uanpui tham a tling lo.

Hei chauh a ni lo. France hian match thum an khelh tawhah goal hnih chiah an la khung a, goal khat hi 'own goal' niin, goal khat dang chu penalty a ni - Kylian Mbappe, Antoine Griezmann leh Marcus Thuram nei team tan chuan a chhe takzet.

Chutihrual chuan France hian goal khat chiah an chhuah a, hei pawh penalty a ni. Team pahnih hian inanna tak an nei - Belgium pawh hian goal hnih chiah an la khung a, goal khat chiah an la chhuah ve tho!

Team pahnih tlarhnung a phui ṭha tihna a ni a, tlarhma nei ṭha ve ve sia goal khung an harsat hi zaninah chinfel an tum dawn - hei mawlh hian inkhel en a tichâkawm a, a chak zawk chuan champion tura inrintawkna an nei thar ang.

Engtin nge ni dawn?

France coach Didier Deschamps-a'n 4-2-3-1 hmangin a team a rem a rinawm a, chuti a nih chuan tlarhmaah Mbappe awmin, a hnung chiahah Griezmann a awm thei ang a, mual sir aṭanga thlawp turin Thuram leh Ousmane Dembele an awm thei ang.

Tlarhnung pui turin N'Golo Kante leh Adrien Rabiot an awm a, a hnungah Jules Kounde, Dayot Upamecano, Saliba leh Theo Hernandez an awm ang a, si ban nghak turin Mike Maignan a ding ang - he team hi an ṭha tawk a, an ṭhat ang erawhin an la khel chhuak lo.

Mbappe-a'n khawvela footballer ngaihven hlawh ber pawl a nih chhan a pholan a hun tawh a, Mbappe aia captain nih phua inngai Griezmann tan tun hi hruaitu ṭha a nihzia pholanna remchang a ni - vawi khat chetsual a pawi tawh dawn.

Les Bleus coach Didier Deschamps chuan, "Team pahnih kan inhrechiang a, anni leh kan tan last 16 pawimawh tawpkhawk a ni. Player ṭha tak tak, a bik takin tlarhmaah an la nei nual - an group-ah pahnihna an nih avangin harsatna an tawk ve tih a chiang a, mahse, thui tak thlen tum team an ni," a ti a, Belgium nena an inkhel tur a thlirlawk.

An hlau lo

Table-a pahnihna ni chungin Belgium-in last 16 an lut a, Ukraine lakah hun tawp lama chak tumna aia draw tumna an neih len avangin fans an lungawi lo hle - a tawpa an chan chu France a ni a, an hneh theih ngat chuan fans pawh an lungawi leh ang.

Belgium coach Domenico Tedesco chuan, "Hnehna chan kan tum dawn - team ṭha kianga len duhin Euro kan tling a, tunah chuan top team kan hmachhawn dawn ta. Hetiang game khelh hi zuam lo ila, Euro kal ṭulna a awm lo a, inah kan tawm ang. Hetiang game khelh hi kan châk a, eng pawh a thleng thei," a ti a, a inringtawk hle.

Tedesco beiseina thlen dik tir turin Kevin De Bruyne bawk a pawimawh leh dawn a, Manchester City thiampuipa a khelh ṭhat phawt chuan Belgium boruak a danglam ang. Chutihrual chuan tlarhmaah Romelu Lukaku pawhin ṭhelh ringawt lo a, goal khung a zir a ṭul a, goal thum an pawmsak loh tawh striker hian pawm tlak ngei goal a khung a hun ta.

Belgium hian an match hmasa berah Slovakia chu 1-0 a ngam loin khawvel mak tih an hlawh a, a hnuah Romania chu 2-0 in hneh mah se, Ukraine nen 0-0 in an inhnehtawk. An result thlirin France hneh tura rin an harsat a, mahse, an player en erawhin theihna an nei.