MBA Junior Official Championship-ah Sainunmawia langsar

NEXA GIG Motors MBA Junior Official Championship 2024 chu June 29, Inrinni khan zawh a ni ta a, Sainunmawia Sailo a langsar ber - Ramhlun Venglai rawlthar hi singles category pahnihah a champion a, doubles category pakhatah final a lut bawk.

June 25, Thawhlehnia neih ṭan inelnaah hian player 215-in inelna hmachhawnin, entry 279 a awm a, match 264 lai awmin, Official Junior Championship-a match a tam ber ṭum a ni hial - Ramhlun Indoor Stadium-a neih inelna hi Mizoram Badminton Association leh Tata Trusts (NEIDA) te thawhhona hmanga buatsaih a ni.

Sainunmawia chu!

Badminton Association of India (BAI) calendar-a lang phak inelnaah hian Sainunmawia a che 'hit' ber a, Sihphir Badminton Club shuttler hian Under-17 Boy's singles leh U19 Boy's singles-ah te champion beisei ngam Malsawmhlua (Mama) leh C. Lalramsanga te deciding game-ah a hneh ve ve a , U19 Boy's doubles-ah Vanlalpekhlua Sailo nen ṭangdunin, pahnihna an ni bawk.

Serchhip rawlthar Malsawmhlua chu category pathumah final a lut bawk a, Ralte Villa BC shuttler hi doubles specialist niin, U17 & U19 Boy's doubles-ah nomawi hlap chhuakin, U17 Boy's Singles-ah erawh Mawia a hneh lo.

Langsar dang

Mesak Lalrawngbawla, Ralte Villa BC player pawh a langsar a, U15 Boy's singles leh U15 Boy's doubles-ah a champion kawp. Chaltlang BC shuttler Denis Romawia Rivung pawh category pahnihah champion-in, U13 Boy's singles leh U13 Boy's doubles-ah te a champion ve ve.

Hmeichhe inelnaah, Kolasib shuttler ṭhangduang Tirza Lalremruati, North Kolasib GSA chuan category pathumah final a lut a, U13 Girl's singles leh U13 Girl's doubles-ah te champion-in, U15 Girl's singles-ah pahnihna a ni - hmeichhe inelna hautak ber U19 Girl's singles-ah Lalrinkimi, Mission Veng Badminton Academy chuan nomawi a hawn bawk.