German ral a len theih nan VAR

Euro 2024 thlengtu Germany-in last 16 inkhel hmuhnawmah Denmark 2-0 in an hneh a, Julian Nagelsmann-a hote tan hian Kai Havertz leh Jamal Musiala ten goal an khung. Signal Iduna Park-ah Die Mannschaft hi chak phu zawk ni mah se hnehna chan theih nan VAR an mamawh.

Inkhelah hian thil thleng a tam a; ṭek leh rial tlak vangin first half-ah inkhelh chawlh lailawk a ni bawk. July 5, Zirtawpni zan hian Germany-in quarterfinal-ah nizana Spain leh Georgia inkhela chak zawk an hmachhawn ang.

Team thar?

Julian Nagelsmann-a'n group stage-ah starting eleven ngai vek a hmang a, last 16-ah erawh Jonthan Tah hrem vangin bul ṭantu player a thlak. Mahse, player pakhat chauh a thlak lo - Tah aiah Nico Schlotterbeck a luh bakah David Raum leh Leroy Sane te Maximilian Mittelstadt leh Florian Wirtz te aiah an lut.

Havertz aiah Niclas Füllkrug lut tura sawi ni mah se Arsenal forward bawkin inkhel bul a ṭan. Denmark pawhin hrem vangin Morten Hjulmand an chhawr thei lo a, a aiah Thomas Delaney a lut. Coach Kasper Hjulmand a fimkhur a, striker Jonas Wind aiah midfielder Skov Olsen a luhtir.

VAR a langsar

Germany-in nung takin inkhel bul an ṭan a, Kasper Schmeichel a rim hle. Mual neitu hian Schlotterbeck hmangin hma takah khungah inngai mah se VAR hmanga en let hnuah Joshua Kimmich-a'n Olsen a dan vangin pawm a ni lo. Kimmich leh Havertz ten Schmeichel hna an siam a, Germany an chungnung zawk.

Mahse, Denmark tan striker Rasmus Højlund-a'n goalkeeper Manuel Neuer chauh a hmachawn hnuah a khung thei lo a, inkhel ṭantir lamah Christian Eriksen a nung ṭha viau bawk.

VAR bawk

Second half-ah Denmark-in bul an ṭan ṭha thung a, box chhung buai nuaih karah Joachim Andersen-a'n chiang zetin a pet goal. Mahse, VAR hmanga ennawn a nih hnuah Thomas Delaney 'ke hmawr' a offside a, goal-ah pawm a ni lo.

Denmark-in goal an khung emaw an tih aṭanga second 16 lekah penalty an chawi a, boruak a inthlak danglam chiang hle. Ball-in Andersen kutah perin 'hero' ni thei kha 'zero' a ni thung. Havertz rawn pen chhuakin minute 53-naah Arsenal forward hian goal kilah a pet lut.

Danish Dynamite-in an si phurh sut an tum luat an tuar a, Schlotterbeck-a ball vawrh luh chu Jamal Musiala-a'n um lutin 'cool' zetin minute 68-naah a khung. Denmark an beidawng lo a, chutihrualin team ṭha zawk laka goal hnih an chhuah avangin thawhchhuah a harsa tawh a, hun pawimawhah Hojlund a hriam tawk lo.

Hun tawp lamah Germany-in goal khung belh theihna remchang an nei a, Havertz leh Fullkrug ten hun ṭha an bawhpelh ve ve. Substitute Wirtz-a'n goal khungah inngai mah se offside vangin pawm a ni lo bawk.

Player inlante

Germany: Neuer; Kimmich, Rüdiger, Schlotterbeck, Raum (Henrichs 80'); Andrich (Can 64'), Kroos; Sané (Anton 88'), Gündoğan (Füllkrug 64'), Musiala (Wirtz 81'); Havertz

Denmark: Schmeichel; Andersen, Vestergaard, Christensen (Bruun Larsen 81'); Bah (Kristiansen 82'), Delaney (Nørgaard 69'), Højbjerg, Mæhle; Skov Olsen (Poulsen 69'), Højlund (Wind 81'), Eriksen (Damsgaard 81')