Euro 2024 dark horse pahnih inlan zan: Dar 12:30-ah Austria vs Turkey

Euro 2024-a champion rinkai ni si lo, team ṭha barakhaih team pahnih Austria leh Turkey te chu zanin dar 12:30 hian Red Bull Arena Leipzig-ah an inhmachhawn dawn. Turkey hi chu inelna apianga dark horse kumhlun a tih theih a, tun ṭum inelnaah erawh Austria hi dark horse 'tak tak' zawk an ni.

Ralf Rangnick hnuaiah Austria hian harhtharhna an chang a, France leh Netherlands awmna group aṭangin pakhatna an ni tlat. Turkey lakah Austria hi chak tura rinkai zawk an ni dawn a, chutihrualin Vincenzo Montella hote hian France emaw Netherlands emaw aia Austria an chang hi an lawm thung ang.

Eng nge beisei theih?

Opta supercomputer chuan Austria chak turin a ring a, Ralf Rangnick hote hi chakna chance 48.2% a pe a, Turkey lam hi 24.9% chakna chance pein 26.8% in draw-na chance awm angin a chhut bawk.

Inelna lian thamah chuan team pahnih hi an vawi khat inhmachawnna tur chauh a ni a, chutihrualin tun hnaia an inkhelhna hnuhnung pathumah chuan Austria vawi hnih an chak. Kumin March thlaa friendly match-a an inkhelhnaah Austria hian 6-1 in an sawp.

Austria hian tun ṭum inelnaah hian an khingpuite an press ṭha thei em em a, hemi tehna PPDA (passes per defensive action) ah chuan Rangnick-a hote aia press ṭha chu Germany chauh an ni.

June 2022 aṭangin Ragnick hian Austria a enkawl ṭan a, a enkawl hnua anni aia Europe ram zinga chak percentage nei ṭha chu Portugal (73%), Spain (67%) leh Netherlands (64%) te chauh an ni. Austria hi Rangnick hnuaiah match 25 aṭangin vawi 15 an chak a, an chak percentage hi 60% a ni.

Engtin zel?

Tun ṭum inelnaah Austria an fak viau a, Turkey laka chak chiang tur erawh an ni lo. Turkey hi Euro 2020 khan che ṭha tura beisei an ni a, mahse first round-ah an tla. Tun ṭumah erawh thawm an nei lian lo a, knockout stage an lut thung.

Turkey hian kum 2000 leh 2008 te khan knockout stage an lut tawh a, kum 2008-ah phei chuan semifinal an lut hial. Mahse, knockout stage-ah hian minute 120 chhung chak hmel an la hmu lo. Kum 16 liam ta khan quarterfinal-ah Croatia chu penalty hmangin an hneh a, semifinal-ah Germany an hneh lo.

Tun ṭumah hian Turkey (Kum 26 ni 170) hi an naupang rual a, group stage inkhel bul ṭantute kum chawhruala anni aia naupang chu Ukraine (Kum 25 leh ni 281) chauh an ni.

Group match hnuhnung bera Turkey-in Czech Republic an hneh khan Kenan Yildiz (Kum 19 ni 59) leh Arda Guler (Kum 19 ni 128) ten bul an ṭan a, Austria lakah pawh bul an ṭan leh ngei a rinawm. Real Madrid tana khel Guler hian hmabak êng tak a nei a, Euro 2024 hi hming chher nan a hmang thei ang.

En châkawm

Austria-in Netherlands an hneh ṭumin Christoph Baumgartner bench-ah an dah a, Poland an hneh ṭuma man of the match-a thlan kum 24 mi hi an hahdamtir a ni zawk. Baumgartner hi RB Leipzig-a khel a ni a, zanina an khelhna tur hi Leipzig khelmual a nih bawk avangin a tlangnel khawp ang.

Baumgartner hian Austria tana a match hnuhnung pariatah goal ruk khungin assist vawi thum a nei a, group stage-ah pawh assist leh goal a nei bawk. Chutihrualin Austria hi mimala innghat an ni lo a, team angin an ṭha. Captain Marcel Sabitzer, Konrad Laimer leh Michael Gregoritsch te tawnhriat a pawimawh khawp ang.

Turkey lamah midfielder tawnrhiat nei ṭha, Inter Milan midfielder Hakan Calhanoglu leh Borussia Dortmund player Salih Ozcan bakah Al Ahli centre back Merih Demiral te an awm a, tawnhriat nei player karah left back Ferdi Kadioglu hming lam hmaih a thiang lo. Kum 24 mi Fenerbahce defender hian tun inelnaah chance vawi 10 siam tawhin group stage-a chance siam hnem ber a ni.