Silly Point : Champeone

Hamara Desh mipui tluklehdingawn chuang ṭhangkhat lian dawn ICC Trophy India rama lo let leh hun beiseina thamral ṭhin chu, a tawp a tawpah chuan Rohit Sharma leh a hote chuan a vaw chhuak ta. Duhthusam ber ICC World Cup leh Test Championship ni chiah lo mah se, kum hnih dana khelh ṭhin T20 World Cup nomawi tal India ramah a lo let leh hi chu, cricket atchilh India fan leh player-te tan, an pem leh hliam tam tak an lo tawrhte atan tidamtu damdawi a ni chiang ngei e.

Champion phu

Tournament ṭan hmaa rinkai ber team Hamara Desh te, an khel ṭha tluang em em a, a tawpah ding chang leh champion an ni pawh hi thil mak a ni lem lo. An tumpui South Africa erawh, ICC trophy nen an inhal emaw tih tur hi an ni ve tawh hrim hrim.

Tun ṭum final-ah pawh South Africa hi dinhmun ṭhaah an ding a, champion thei dinhmunah ding mah se a tawpah an chesual. Proteas an vanduai a, chutihrualin India-in champion an phu a, player neih ṭhat rah seng. Team ṭha ber leh champion phu ber an champion tiin a sawi theih a ni.

Final hmuhnawm chu

A changtupa chu a tawpah a che ṭhin tih ang deuhin, form chhe ve tak Virat Kohli-a'n infiamna khawvela mi ropuite lo tih ṭhin hnung zuiin, a stage sang berah harhtharna a chang. Kohli hi batsman puiten an peih lohsan deuh vek nachungin, Axar Patel-a'n rinawm takin a dinpui.

Axar Patel hi international match a khelh hnuah a batting ṭha telh telh a, all rounder pangngai a ni ta hial. India-in 176 runs an siam a, target ṭha tak chu ni lo mah se a tlem chhe lem lo. Indian spinner-ten final theihnghilh tlak an hman laiin, pacer pathum Jasprit Bumrah, Arshdeep Singh leh Hardik Pandya te an vawm ṭha rual vek.

David Miller-a ball vuak boundary-a lo mantu Suryakumar Yadav-a ball man kha, 'Championship Catch' kan ti thei hial ang. Dinhmun inthlak zak zak karah, a tawpah India an dingchang a, 2024 ICC World Cup champion chu team ṭha ber India te an ni ngei e.

A pawimawh

Tunhnai chhoa fakna aia sawisel hlawh chho tak, India mipui tam takin fiamthu thawh nana an hman ṭan, BCCI Apex Council-a meizang hlaptu ber chu an Secretary Jay Shah hi ni. Central lamah a pa te vawk lal lenna chu chuai ṭanin, coalition sorkar lo piang tawh nen, an dinhmun a nghet lo ve telh telh.

Jay Shah leh a thawhpuite paihthlak tum leh hmelma tam takin an hual vel karah India-in T20 World Cup nomawi an chawi. BCCI Apex Council member ho tan chuan 'temporary oxygen' a ni ringawt mai a ni. India head coach kal chhuak tur Rahul Dravid-a tan thawk huaina tur a ni bawk.

T20 World Cup la champion ngai lo Virat Kohli thlamuang takin a retire zui bawk a, a career chhunga ICC World Cup chawi ve ta lo tur kaptan Rohit Sharma tan, a bul ṭana 2007-a tleirawl a nih laia a lo champion tawh na tournament a bawk a career parda khar phui nan a hmang veleh thei bawk. India mipui te an thaw huai bawk kan ti thei ang.

Tichuan

Hnah hlui an lo ṭilṭiak a, kumhlun tur awm lohna khawvelah Virat Kohli te, Rohit Sharma te pawhin T20 format bik chu an lo mangtha ve ta. Coach Rahul Dravid-a'n a chawlh thu a puang tawh bawk.

Ravindra Jadeja leh ṭhenkhatte pawhin T20 bika chawlh an puan hi beisei lawk deuh vek a ni. Kum hnih dana khelh ṭhin ICC T20 World Cup chu, BCCI office chhuarah hun mawi an ni ta phawt. Mahse, an tum ram ber leh ramtiam ICC Test Champion leh ICC World Cup 2027-a awm leh tur a tan, tun aṭang hian BCCI lam chuan hmathlir a neih ngei a ngai ang.