Duhtak football, run lawi zai rel tawh la...

"Football-in run a lawi dawn e," tia inti neitu taka zai ṭhinte zawk khan run an lawi ṭep a! Pathianni zana khelmuala England ṭawiawmtu fans tam tak kha chuan an hotel book tawh sa, cancel dan an ngaihtuah hman mai thei - mahse, chung zawng zawng chu nghilhin, hlim zai an vawr ve leh ta e!

Pathianni zan khan England chuan 2-1 in Slovakia an hneh a, Euro 2024 quarterfinal khel turin an inpettling - match li an khelh tawhah England-in beisei an la phak lo vek a, mahse, beisei phak lo chung pawha quarterfinal thleng an nih miau avangin dah hniam an harsa leh sawt.

Slovakia hian Ivan Schranz hmangin minute 25-naah goal hmahruai an khung a, goal venhim chu thupui bera an neih zui avangin England an che thei lo. Mahse, hun pek belh minute nganaah football ropuina temtir kan ni a, Jude Bellingham chuan si phurh sutna goal a khung - a mawi ngang mai!

Goal dang lut loin hun a tawp zui a, extra time-ah Harry Kane-a'n chakna goal a khung zui - hun rei zawk hmahruaitu Slovakia an tliak hnawp a, Switzerland-in quartefinal-a hmachhawn turin, nghakhlel takin England an lo hmuak e.

Beisei phak England!

A mak in ti mai thei - beisei phak England tih hi. Ni e, Three Lions hi Euro ṭan hma kha chuan inkhel hmuhnawm tak pho chhuak tura beisei an ni a, mahse, inelna ṭan a nih meuh chuan fans tam tak beisei a sang lo. Slovakia lakah pawh game hmuhnawm tak min chhawpsak aiin, beisei an phak loh a rinawm zawk a, beisei phak lo tura kan beiseinaah khan beisei an va phak tak!

Three Lions hian inkhel ṭantir lam kha chu an rawn ti ṭha viau a, a rei tawlh tawlh a, an zuai tial tial - minute 90 chhungin Harry Kane-a ball tauh leh Declan Rice-a post pet per tih loh chu chance duhawm han chhal tur pawh an nei lo a, kawng tinrengah an hnufual a ni ber.

Minute 25-naah Slovakia-in goal an khung a, England fans an reh ṭhiap. A tira ball vawrh luh satliah nia lang aṭanga ball kal zel chu David Strelec-a ke bulah a tla a, Slovan Bratislava forward hian Schranz tan a siamsak - tun inelnaa a goal thumna ni turin goal-ah a lo chantir.

Slovakia an inlungrual a, an tlarhnung a khawng ṭha a, player-ten an tih tur an hrechiang a, England tlarhmain an su hawng thei hlawl lo a ni ber - minute 90 chhung goal dang kan hmu lo a, Slovakia fan-te hlim taka zai turin an inpeih ṭan.

A tawpah chuan...

Vai film ang mai a ni a, thawnthu ziak thiam takin a duh ang thala thawnthu a duang ang mai a ni. England fan-te beiseina zawng zawng a bo tawh hnuah khan player danglam bik a lo lang a, a hming chu Jude Bellingham a ni.

Kum 20 mi midfielder hian Marc Guehi-a ball tauh thlak chu boruaka invawrh kang chungin, an 'bin' lut tehreng a nih kha - England fans an sapatal a, anchhia tinreng dawng tura inpeih tawh Bellingham fakna chu a fawn vel ta zawk. A class takzet.

Extra time khelh zui a ni a, England an phur thar - inkhel nung lo leh en hrehawm tak kha a nung thar a, thawm a ring zual sauh bawk. Minute 91-na a ni a, England bawk kan hmu. Captain Harry Kane-a'n a tih tur tak tiin, Ivan Toney-a ball tauh chu chiang mangkhengin goal-ah a lo tauh lut.

Minute 90 hnaih lama hun khawhral dan ngaihtuahtu Slovakia chu a hmanhmawh zawkah an ṭang leh ta thung a, mahse, hun tawp thlengin goal dang a lut tawh lo. England an chak a, a thiam pariat zingah an inhlangkai.

Thutlukna fuh

Gareth Southgate-a'n midfield-ah Trent Alexander-Arnold leh Conor Gallagher a enchhin tawh a, a la hlawhchham ve ve. Slovakia lakah Kobbie Mainoo rin a thlang a, English coach-in thutlukna a siam fuh niin a lang.

Kum 19 mi midfielder hian ball a keng ngam a, chance siam tura box chhunga ball tlan luhpui a ngam a, vawi 68 pass a neih zinga vawi 65 chu a tidik bawk - chutihrual chuan a naupanna a lan chang a awm a, han phulpui hlutna tur a la awm rih lo.

Southgate-a'n substitution a siam fuh bawk. Bench aṭanga lut Cole Palmer, Eberechi Eze leh Toney-te chu Kane-a goal luh theihna turin an inrawlh vek a, Toney-a'n khelmualah hun hmang tam lo mah se, a tuihalna hmuh turin a awm a, Palmer mawlh hi - bul ṭan tawh se, ti an tam ang.

A tawpah erawh hei hi hriat a ṭul - England-in chak phu tak chungin hnehna an chang a ni hran lo a, an vannei tel tih phat rual a ni lo. Italy pet chhuaktu, team inlungrual tak Switzerland-in an lo hmuak a, an lawmna hian rei a daih lo ve palh thei.