Georgia, in tan Spain an sang lua e!
Portugal hneh a, mang rama cheng mek Georgia chu an mumang aṭanga kaih harhin an awm nghal a, a vawi khat nana an khelh European Championship chu round of 16-ah an mangṭha ta.
Pathianni zan khan Georgia hian Spain an hmachhawn a, tun tournament-a la khel ṭha bera chhal ngam team lakah hian dawl zawrin an zawr - Robin Le Normand (own goal) hmanga hma an hruai zuk avangin result mak an thlentir leh dawn em ni chu aw, tih mai a awl hman.
Mahse, Spain-in Rodri hmangin si phurh an sut a, Fabián Ruiz, Nico Williams leh Dani Olmo ten goal khat ṭheuh an khung zui a, 4-1 in Spain an chak a, quarterfinal an lut - inelna thlengtu Germany nen an intawng dawn!
Georgia beiseina
France international hlui Willy Sagnol-a enkawl Georgia tan Euro khelh phak ringawt pawh thil ropui a ni tawh a, Portugal meuh hneha round of 16 luh phei chu an tan thawnthu ngaihnawm tawpkhawk a ni.
Georgia hian he thawnthu ngaihnawm hi an belhchhah zel dawn emaw an ti hman - Spain-in inkhel ṭantir aṭangin Georgia hi na takin an nawr a, "Goal an khung ang em?" tih ai chuan, "Engtikah tak khung ang maw?" tih chu zawhna zawk a ni a, Georgia-in an ngam ngang lo.
Mahse, minute 18-na a ni a, mipui beisei loh thil a thleng. Otar Kakabadze-a ball cross chu Khvicha Kvaratskhelia-a pressure pek karah Spain defender Robin le Normand chuan an lamah a tilut a, Georgia fan-te hlim hmel mawlh kha!
Mahse maw...
Georgia-in goal an khung hnuah an inringtawk sawt a, mahse, team ṭha bik danglamna a lang. Rin loh taka si phur Spain an hlauthawng duh lo a, minute 39-naah Spain tan Rodri chuan penalty box pawn aṭangin si phurh sutna goal a khung.
Mahse, first half chhungin goal dang a lut tawh lo a, Georgia-in fak an phu takzet - Georgia tan goalkeeper Giorgi Mamardashvili a chet ṭhat chhunzawm a, beiseina nei chungin chawlhlawk an hmang.
Second half-ah pawh Georgia-in chance hlauhawm an nei hmasa zawk a, an vanneih zan a ni lo mai mai! Minute 48-naah Kvaratskhelia chuan Spain keeper Unai Simon lo tlan chhuak chu hmuin, halfway line vel aṭangin a pet a, uiawm takin goal hrulah a kal.
A tawpah Spain
Inkhel a rei tawlh tawlh a, Spain ṭhatna hmuhtirin kan awm - mual sirah dan pangngaiin Lamine Yamal leh Nico Williams an hmuhnawm dawn a, Georgia tlarhnung vawi tam an lam khum a, an chelh meuh lo a ni ber.
Minute 51-naah Fabian Ruiz chuan hmahruaina goal khungin, Yamal-a siamsak a ni a, he goal a luh hi chuan chak tur a chiang ṭan. Minute 75-naah Ruiz hian Nico Williams-a khung tur a siamsak ve leh a, 3-1 a ni der.
Hun tawp nan minute sarih chiah a awm tawh tihah bench aṭanga luhtir Dani Olmo chuan goal a khung ve leh a, hun tawp thlenga goal dang lut tawh loin Spain an chak chiang.
Champion rim nam
Spain-in group of death-ah tlawm nei loin last 16 an lut a, Croatia (3-0), Italy (1-0) leh Albania (1-0) te harsatna nei loa an hneh hnuin, Georgia chu 4-1 in an sawp leh ta - champion rim an nam!
La Roja manager Luis de la Fuente chuan, "Chance vawi tam kan insiam a, 8-1 a chak pawh ni ila, thil mak a ni lo ang. Kan khingpuite kha an ṭhat em avangin he result hi kan ngaihlu hle tur a ni," a ti.
De la Fuente chuan Germany nena an inkhel tur thlirlawkin, "Germany nena kan inkhel tur hi chu World Cup final ni awma mawi a ni a, team ropui tak kan hmachhawn dawn a ni," a ti a, champion tumin inelna thlengtu an hmachhawn ang.
Mangṭha Georgia
Euro 2024-ah FIFA ranking-a hniam ber (75-na) ni chungin an inlan a, mahse, a thiam 16 zinga tel chungin inelna an mangṭha ta - Georgia-in team dang angin star player ngah lo mah se, an thawhhona ṭha leh an huaisenna chu hmuhnawm a tling.
Spain lakah pawh goal venhim ringawt ngaihtuah loin, a nawrtu zawka ṭan an neih chang a awm a, he team hi an danglam a ni. Georgia coach, France international hlui Willy Sagnol chuan, "Nakinah chuan kan hnathawhte kan thlirkir ang a, kan lawm khawp ang.
"He team ṭhan zel dan hi a ropuiin, ka chhuang thlawt a ni. Tunah chuan kan zinkawng a tawp ta a, mahse, hei aia ropui zawk hian min hmuak ang tih ka ring. Georgia mipuiten thil pakhat an duh vek ang tih ka ring a, chu chu kan lo kir leh hi a ni," a ti a, hetah tawp an tum lo.