Netherlands leh Romania intawng dawn

Euro last 16-ah zanin hian Netherlands an inlan dawn a, Belgium, Slovakia leh Ukraine te nen awm ho chunga group hmahruaitu ni thei Romania nen zan dar 9:30 hian an intawng dawn.

Champion tura rin hlawh pawla mi an ni chungin, Netherlands-in beisei an phak lo a, group stage match thumah vawi khat chiah an chak - France nen inhnehtawk mah se, an match hnuhnung berah Austria chu 3-2 in an ngam lo.

Netherlands tlarhnung a pawp a, captain Virgil van Dijk-a'n kawh rawn a hlawh a, Liverpool captain ni bawk hian a khel chhia tih a pawm thu a lo sawi tawh - midfielder Tijjani Reijnders chuan Austria an hneh loh hnuah khan an tihsual an zir nasat thu a sawi.

Reijnders chuan, "Thil tam tak kan sawi ho a, mahse, tunah chuan kawng dik lam kan pan mek e. Tunah chuan tlawm a thiang tawh lo - chak chuan kal zel, tlawm chuan puanthuah tel a, haw a ni tawh mai," a ti a, Romania laka chak an tum thu a sawi.

Euro 2024-a beisei phak lo langsar, tlarhmaa Netherlands innghahna Memphis Depay chuan, "Team boruak a ṭha a, engemaw han awm ve zauh hi chu thil nih dan phung a ni. Thla khat chhung kan awm ho tawh a, result ṭha tak hlawhchhuah kan duh.

"Result a ṭhat loh chang chuan thinrim hi thil awm ve reng a ni. Mahse, harsatna tawh miah loh chuan a hmawr bawk ṭhat hi a harsa viau ṭhin ania," a ti a, an chetsualnate theihnghilh a, nomawi chawi an tum thu a sawi.

Romania-in Netherlands angin player langsar kawl lem lo mah se, team boruak ṭha leh inlungrualna chu an hmachhuan ber a ni a, Pathianni khan coach Edward Iordănescu leh a staff-te chu Würzburg Orthodox Church-ah an inkhawm thlap a, an inhlan thar.

Iordănescu-te chhungkua hi kristian ṭha tak niin, Orthodox Biak ina an inkhawmnaah pawh hian puithiam chu inṭawngṭai tirin, an squad pumpui tan malsawmna an dil - Romania team an inringtawk a, Netherlands hneh theih an inbeisei.

Romania hi player langsar kawltu Ukraine laka 3-0 a chak thei an ni a, Belgium (2-0) lakah tlawmin, Slovakia (1-1) an inhnehtawkpui thung - hnehna an chan dawn chuan Rangers attacking midfielder Ianis Hagi, Trabzonspor forward Denis Drăguș leh FCSB winger Florinel Coman te tlarhmaah an chet ṭhat a ṭul.