Copa America : Group stage paltlang zo lo Mexico

Venezuela leh Ecuador ten Copa America 2024 quarterfinal an lut a, hetih lai hian team ṭha zinga mi Mexico erawhin group stage an paltlang zo lo a, a thiam zual pariat chin inelnaah an hmel kan hmu ve dawn lo.

Nimin zing khan Group B ten an league round match hnuhnung ber an khel. Venezuela chuan a chung bera awmna tichiang lehzual turin Jamaica chu 3-0 in an hneh a, match thum an khelh tawhah an chak kim vek.

Venezuela tan hian Eduard Bello, Salomon Rondon leh Eric Ramirez ten goal khat ṭheuh an khung a, nuamsa takin point thum an hlawh chhuak. Quarterfinal-ah chuan Group A lama pahnihna Canada nen an inhmachhawn leh ang.

Inkhel dangah chak mamawh Mexico chuan goal an khung thei lo, an khingpui Ecuador nen 0-0 in an inhnehtawk. Ecuador nen hian point li ve ve an hmu a, goal difference nei ṭha zawk Ecuador an tlang ta a ni.

Beisei phak loin Mexico an tla a, coach Jaime Lozano chuan a dinhmun ngai a luah chhunzawm thei dawn em, tih zawhna chu a lian nghal hle. Mexico sporting director Duilio Davino chuan, "Kan ramin kan thil tum leh hmathlir chu a la ngai reng.

"Chawlhkar hnih hnuah Jimmy hian Mexico football thuneitute hnenah inelna kan hmachhawn taka thil thleng chungchang hi a sawi ang a, tah chuan kan hma hun kan ngaihtuah ang a, engtin nge hma kan sawn theih ang tih chu a pawimawh lai a ni.

"Tuna kan thil tum pui ber chu kum 2026-ah engtin nge team ṭha leh hlauhawm tak kan neih theih ang tih a ni," a ti a, an coach Lozano chu ban tumna an nei rih lem lo tih a sawi a, coach Lozano pawhin goal khung an harsatna chu chinfel dan tur an ngaihtuh tur thu a sawi ve bawk.