Austria-ah George Russell chak

Austrian Grand Prix an tlan dawn kha chuan, intlansiak dangte ang bawkin Max Verstappen chu chak tura rinkai ber a ni - mahse a tawpah erawh George Russell chu a vannei berah ṭangin a chak ta daih a ni.

Red Bull driver ṭha Verstappen a tlan ṭha lehpek hle a, chak tur pawhin a dinhmun a ṭha. Amaherawhchu, amah hnaihtu Lando Norris nen an intai karah Russell tan kawng a inhawng a, tun season chhunga a vawi khat nan hnehna a chang.

Mercedes driver hian car intlansiakna sang berah hian a vawi hnih nan chak ni hmel a hmu ta a, tun hnaiah hmasawn chho zelin Verstappen chhaih buai phaktu zingah a inhlangkai mek a, hmasawnna tur lai erawh a la ngah.

Britain tlangval George Russell chuan, "Max leh Lando te na takin an inum tih kha ka hmu a, ka rilruah chuan Lando khan chak tumin a theihna leh thiamna zawng zawng a hmang dawn tih pawh ka hria, ka tan kawng a awm meuh lo turah ka ngai bawk.

"Intlansiak hautak leh harsa tak karah ka chak hlauh a, mimal aiin team lamin min puihna vang pawh a ni," a ti. Pathianni boruak kha a lum hle a, khaw lum karah car ke an thlang fuh a, a hmaa tlante chet fuh loh zar a zo tel bawk a ni.

Driver championship lama hmahruai mektu Verstappen chu chak ta lo mah se panganaah a la thleng phak tho a, a elpui ber Norris a tlan tluan ve theih tak loh avangin a hmahruaina chu a sawhnghet ta tho bawk.

Dutch tlangval, a zawna vawi thum champion thei Max-a hian point 237 hmuin a chung berah a awm mek. July 7, Pathianni zan dar 7:30 hian British Grand Prix an tlan leh dawn, a tihsual aṭanga insiamṭhat ngei tumin a inlan ang.