Bagnaia leh Martin inkar a zim zel

Francesco Bagnaia chuan Pathianni zana tlan zawh tak Dutch MotoGP-ah hnehna a chang a, rider championship lama hmahruaitu Jorge Martin nen an inkar sawr zimin, a phak lohna chu point 10 chauh a ni ta.

TT Circuit Assen-a intlansiakah Bagnaia a che fuh, inelna pangngai neih hmain sprint race-ah a chak phawt a, intlansiak pangngaiah pawh a hmasa ber aṭanga bul ṭanin amah hnaih bertu Martin aiin second 3.676 in a thleng hma zawk.

Bagnaia ang bawka Ducati Lenovo rider pakhat zawk Enea Bastianini chu pathumnaah a thleng thung. Spanish rider Martin hian qualifying-ah tihsual a neih avangin hrem a tawk a, pangana aṭanga bul a ṭan avangin a tan a thlen chin hi a ṭha.

A zawna vawi thum champion nih tum mek Bagnaia chuan, "A tirah khan ka elpuiten min nawr na em em a, a nihna takah chuan ka hlauthawngin ka tyre thlan kha a fuh tawk lo emawni ka ti hman hial.

"Mahse, mak tak maiin lap tinah hma ka sawn zel a, midang tlan chak tak tak karah hnehna ka chang, kei leh ka team chet danah hian ka lungawi takzet," tiin a tlan danah a lawm tih a sawi.

Assen tlankawngah hian Australian rider Mick Doohan chuan kum 1996-1998 chhung khan a zawnin vawi thum hnehna a lo chang tawh a, ani hnu lamah chuan Bagnaia hi vawi thum chak zawn leh thei awmchhun a ni hial.

Tun kar tawp hian MotoGP intlansiak a awm zui leh nghal dawn - Pathianni tlai dar 5:30 hian Sachsenring tlankawngah Germany Grand Prix an tlan leh ang.