Wimbledon-ah champion ngei ka duh - Novak Djokovic

Wimbledon 2024 chu nimin tlai aṭang khan khelh ṭan a ni a, mipa seeded pahnihna Novak Djokovic chuan champion ngei a tum tih a sawi, a match hmasa ber atan zanin hian Vit Kopriva a hmachhawn ang.

Serbian star hian Wimbledon title hi vawi sarih a la tawh a, grass court inelna liana player ropui Roger Federer a champion tam record tluk turin vawi khat champion chauh a mamawh tawh, kuminah tluk theihna remchang a nei.

Kum 37 mi Djokovic chuan, "Wimbledon hi chu a theih hram a nih chuan khelh zel ka duh ṭhin, kuminah pawh a tir lamah khan harsatna ka nei dawn deuh niin lang mah se tel tum lohna ka nei lem lo.

"Ka kum a tam tawh a, chuvangin tournament zawng zawng khelh a remchang tawh lo tih pawh ka hria. Mahse, chutiang karah pawh chuan Wimbledon hi khelh ngei zel ka duh a, chu mai piah lamah champion ngei ka duh bawk," a ti.

Tennis season kal laiah Djokovic hian beisei a phak lo, nomawi a la chawi lo a ni. Inelna lian Australian Open leh French Open-ah pawh tun hma lama a boruak kha a phak lo a, a tan Wimbledon pawh a awlsam lo ang tih a rin theih.

Grand Slam vawi 24 champion tawh Djokovic chuan, "Hmanni lawkah ka khup hliam zai a ni a, eng ang taka dam leh ṭha nge ka ni tih fiah turin All England Club hi ka pan, round tlemtê chauh ni loin a rei thei ang ber khelh ka tum.

"Tun hnai chawlhkar thum chhung chu in lam inenkawl nan hun ka hmang nasa a, chuvangin tennis court chhunga ka dinhmun tur tak hi ka sawi huai ngam lo thung a, chutihrualin tawnhriat tam tak ka neih tawhte an ṭangkai ve thei ang," a ti.

Djokovic hian Wimbledon bakah Paris Olympic pawh khelh ngei a tum tih a sawi tawh. Tun nipui chhungin inelna lian pahnih a awm dawn a, a hun a inhnaihchilh deuh avangin player ṭhenkhat chuan pakhat zawk khelh loh an tum fur.

Serbian star Djokovic erawh a ngaihdan a danglam leh tlat thung, ram a hmangaih em avanga Serbian miten an ngainat hian an ram tan Olympic a khel dawn a, hei hi an ram mipui tan chuan chanchin lawmawm a ni ngei ang.

Olympic hmain Wimbledon hi a ṭha thei ang bera khelh a tum ang. Wimbledon hi July 14 thleng khelh tur a ni a, hetih lai hian Paris Olympic neih tura tennis inelna chu July 27 aṭanga khelh ṭan tur a ni thung.