Vanglaini Biangbiakna I League khel tur Sudeva: Eng nge an hmachhawp?

"Kum 37 ka ni ve tawh a, ka damchhung zawnga ka hun tawn hlimawm ber a ni," tiin Sudeva FC neitupa Anuj Gupta chuan Vanglaini a hrilh a, I League khel tura an dilna pawm a ni ta chu a lawm hle. 

MFA secretary Lalnghinglova Hmar telna All India Football Federation (AIFF) hnuaia Bid Evaluation Committee chuan season thara I League khel tur hi August 12 tlai khan video conference hmangin an thlang a, Sreenidhi (Visakhapatnam) leh Ryntih (Shillong) aiah Sudeva hi thlan an ni.

I League khel turin dilna thehluh theih mah se phur thut vanga dil ngawt theih a ni lo - Indian football-a league sang pahnihna khel tur hian sum neih chu a pawimawh hmasa zinga mi a ni a, official taka puanzar awm lo mah se an bank account-ah vaibelchhe 100 tal an neih a ngai niin an sawi. 

Sudeva lakluh an nih tak avangin season tharah chuan I League khel tur club 12 an awm dawn tihna a ni a, club awm sa 10 bakah second division champion leh Sudeva nen hian 12 an ni. 

Indian Super League khelh ṭan a nih khan AIFF-in ram khawpui bera club a awm ngei an duh a, Delhi berin football-ah hma a sawn loh chuan India tan football hmasawnna kalkawng a zau tawk loah an ngai. 

ISL season hmasa berah Delhi Dynamos an tel a, sum pawh an hmang na hle - player langsar Alessandro Del Piero-te an nei thei a, coach-ah ni se Roberto Carlos leh Gianluca Zambrotta te an chah lut thei. Mahse, Delhi Dynamos-in khelmual leh a pawn lamah beisei an phak lo a, an beisei angin sum an hmu lo - season hmasa ṭan dawn khan Odisha lamah an insawn a, an hming pawh Odisha FC tih a ni ta. Chutiang boruak karah chuan Sudeva FC an lo lang nawlh a, Delhi aṭanga I League club hmasa ber ni turin thlan an ni ta. Delhi football fans an lawm a, a lawm ber zingah Dr. Shaji Prabhakaran a tel. 

FIFA Development Officer (South Asia) dinhmun lo chelh tawhtu leh Football Delhi president ni mek Shaji hi Sudeva an tlin rual khan Vanglaini chuan a be pawp nghal a, a lawm hle. 

Shaji chuan, "Delhi aṭanga I League club kan nei thei ta hi ka lawm takzet a, theihtawp chhuahin puih an ngaihna lai apiangah chuan kan pui ang. Hei hi Delhi football tan chuan hmasawnna a ni," a ti. 

Sudeva president Anuj Gupta chuan, "Delhi tan theihtawp kan chhuah dawn. Hei hi kan club tan mai a ni lo a, Delhi khawpui tan a ni. Khelmual leh thil dang 

ṭul leh mamawh zawng zawngah theihtawp kan chhuah ang," tiin Vanglaini a hrilh.

Delhi club hian an innghahna khawpuiah hian Sudeva Sports Village tih chu an din a, he hmunah hian football mai ni loin cricket leh tennis zirna thlengin an nei - FIFA Under 17 World Cup 2017-ah khan Sudeva khelmual chu FIFA-in training ground atan a lo thlang tawh. 

October 2019-a Indian football kal dan tur puan a nih khan Indian Super League chu Indian football-a league sang berah puan a ni a, 2022-23 season aṭang chuan I League champion-in ISL an khel thei dawn. 

Anuj Gupta chuan, "Hmasawn zel kan duh a, kan thlen chinah hian lawm mai tur kan ni lo. Indian Super League hi a tir aṭanga kan mangphan chu a ni a, ISL khelh phak tumin kan inbuatsaih dawn a ni," a ti.

Sudeva tan awlsam taka I League champion nih erawh a theih loh ang - Covid-19 vangin ram pawn player nei sa lo tan a thar lak a har a, Anuj hian a academy en 'chhin' a duh bawk avangin Indian player hlangin a khel dawn.

Anuj chuan, "Covid-19 vangin thil a harsa tih mi zawng zawngin an hre vek a, kan duh angin kan che thei lo. Ram pawn player ka la dawn lo a, academy aṭanga inzirchhuak leh tawnhriat nei ṭha Indian player-te kan chawh pawlh dawn a ni," a ti. 

Sudeva president Anuj Gupta hian Cardiff University, UK aṭangin dan lam a zir chhuak a, London-ah hun engemaw chen dan hremi nia hna a thawh hnuin kum 2009 khan India-ah a lo kir. 

India-ah a lo kir hnu hian law firm ANM Global Solicitors & Advocates-a din a, India ram hmun parukah office an nei mek. Shriram College of Commerce-a a luh laiin college football team captain a ni thei. 

Kum 2014 khan a ṭhianpa, engineer hna thawk leh environmentalist ni bawk Vijay Hakari nen a hunlaia Moonlight FC tih chu leiin a hmingah Sudeva FC tih an vuah a, school ṭhenkhat nena ṭangkawpin football academy an kalpui bawk. 

School thawhpui mai duhtawk loin residential academy an din zui a, Sudeva academy-ah hian tun dinhmunah hnathawktu 50 vel an nei mek - student 30% chuan scholarship dawngin a thlawna zirtir an ni a, a bak 70% hian pawisa an chawi thung. 

Sudeva hian danglamna tak pakhat an nei a, chu chu football ngaihsanna ram Spain-a football club an nei tel hi a ni - Spanish fourth division club CD Olimpic de Xativa an nei tel mek. 

Anuj chuan, "Kan academy player-te pawh Spain-a khel turin kan lo thawn tawh ṭhin a, la tih zel pawh kan tum. Kan duh phawt chuan CD Olímpic de Xativa aṭang hian player pawh kan la thei ang. 

"Mahse, sawi tawh angin Covid-19 vangin thil a la harsa em em a, kan duh anga chak pawhin hmalak theih a ni lo. Tun season lo awm tur bikah hi chuan player inthleng pawh a theih loh ang," a ti. 

Sudeva-ah hian Nigeria international hlui, World Cup 2002 leh 2010 squad-a tel phak Rabiu Afolabi chu technical director a ni mek a, ani hi Red Bull Salzburg leh AS Monaco tan pawha lo khel tawh a ni - UEFA A Pro License neitu Xavier Cogollos Fernandez chu head coach a ni mek bawk. 

*    AIFF chuan June 10 - June 20 inkar khan New Delhi, Ranchi, Jaipur, Jodhpur, Bhopal, Lucknow, Ahmedabad leh khawpui ṭhenkhat aṭangin I League khel duh tan khelh dilna hun a hawng. 

*    Sudeva (Delhi), Ryntih SC (Shillong) leh Sreenidhi (Visakhapatnam) ten khelh an dil a, Sudeva pawm a ni - Sreenidhi hian 2021-22 aṭangin an khel ṭan ve ang. 

*    AIFF Bid Evaluation Committee chuan dilna hi an enfiah a, auditor atan London-a hmunpui nei Pricewaterhouse Coopers (PwC) chu hman an ni. 

*    Sudeva hi season tharah chuan an relegate thei dawn lo a, hei hi season khat a tan bak a ni lo thung. 

*    Bengaluru FC, Minerva Punjab (Punjab FC), Chennai City FC, Bharat FC, DSK Shivajians leh Gokulam Kerala FC te chu direct entry hmanga I League lo khel tawhte an ni.