World champion an chak nghal

European Championship 2016-ah Germany an rawn inlar ta, 2014 FIFA World Cup champion hian Pathianni zan khan Ukraine 2-0 in an hneh. Group C inkhel dangah Poland-in Northern Ireland chu goal khatin an hneh ve bawk.

Besei loh aṭangin goal

Germany boss Joachim Low-a'n Euro 2016 ṭan hmaa an friendly match hnuhnung bera Hungary an khelh ṭum angin player-te a rem a, a danglamna chu inhliam vanga thawn haw Antonio Rudiger aiah Shkodran Mustafi chu luhtir a ni.

Valencia defender Mustafi hi bench-a ṭhu tura ngaih ni mah se khelhna hmun a chan takah chuan a hun ṭha a hmang ṭangkai hle. Kum 24-a upa Mustafi hian minute 19-na lekah Toni Kroos-a freekick mawi tak chu goal kilah a tauh lut a, ram tana a goal khung hmasak ber a ni.

Germany-in squad an puan khan Bastian Schweinsteiger tel ve chuan sawisel a hlawh a, kum 31-a upa midfielder hi Manchester United-ah a inlan tam loh avangin Joachim Low thutlukna an dem hi a mak lo. Amaherawhchu kum hnih liam taa World Cup an champion ṭuma final-a a theihna zawng zawng chhuahtu Basti hi Germany tan chuan player ṭha a la ni reng.

Schweinsteiger hian minute 90-naah Mario Gotze rawn thlakin field chhungah minute 3 leh second 52 chiah awmin ball vawi khat chiah a khawih a, a ball khawih chhun hi goal-ah a chantir.

Arsenal midfielder Mesut Ozil-a'n ball pass thiam bik a nihzia a lantir ang chiahin ram tan Basti-a'n a theihna zawng zawng a chhuah tih a lang bawk. A goal khung lawm tur hian United midfielder hi technical area-a a teammate awmna aṭanga goalkeeper Manuel Neuer awm thleng a tlan!

German ral lian?

Ukraine lakah Germany an chak zawk a, an tlar hma erawh chhuan tham a la ni lo. Bayern Munich-a hmun chang tam lo Gotze chu tlarhmaah a hriam tawk lo a, Thomas Mul-ler lah field sir lama hmun a chan tam avangin a hlauhawm tawk lo.

Pep Guardiola hnuaiah chuan field sirah Franck Ribery, Douglas Costa leh Kingsley Coman-te awmin goal khung thei bik player Muller hi goal khung turin field lai lamah a tal tam a, Ukraine nena an khelh ṭum hian a theihna an up ral niin a lang.

Germany midfield laia awm Toni Kroos leh Sami Khedira te erawh ball pass an thiam thlawt. Man of the match-a thlan Real Madrid midfielder hian vawi 113 pass-ah vawi 105 a pass dik a, Juventus midfielder Khedira pawhin vawi 78 a pass aṭangin vawi 70 a pass dik.

Tlarhnung pawp

Germany-in ball possession 63% zet neiin inkhel thunun a, goal chance pawh ngah zawk mah se an tlarhnung a phui lo a, vanduai ṭum chu ni se chak lo thei an ni.

World Cup champion ṭuma captain Philipp Lahm-a'n ram tana inkhelh la chawlhsan lo se chuan an buaina tam zawk hi chu chinfel theih a rinawm. Schalke defender Benedikt Howedes-a'n Sevilla winger Yevhen Konoplyanka a ngam lo a, field vei lamin aṭangin Ukraine-in an nawr na hle.

Kum 26-a upa Konoplyanka goal khung tur hi Germany defender Boateng-a'n goalline aṭangin a pet chhuak a, keeper Manuel Neuer a rim viau bawk. Ukraine legend Andriy Shevchenko chu coaching staff zingah a tel a, AC Milan striker hlui anga hriam hi field chhungah awm se chuan Germany hian point thum an hlawh kher lo ang.

Sweeper ang maiin keeper Neuer a khawsa leh a, club tana a khelhpui Boateng nen inhrethiam viau mah se Mustafi nen an inman tawk lo. Valencia defender hian hun tawp lamah Neuer-a tlan chhuak hmu loin a ti goal teuh hle.

Eng nge an sawi?

Germany boss Jochim Low chuan, "Inkhel kan thunun a, amaherawhchu Ukraine tlarhnung khawng ṭha tak paltlang erawh thil namai a ni lo. A pumpuia thlirin kan khelh danah ka lungawi," tiin a sawi.

Germany goal khungtu Bas-tian Schweinsteiger chuan, "A ropui a ni. Inhliam vangin minute 90 emaw 120 emaw chu ka la khel tlak lo a, mah se hun rei zawk khel turin ka rilru a inpeih a ni. Ka damṭha chho zel a nih chuan hun rei zawk ka khel thei ang," tiin a sawi.

Ukraine coach Mykhaylo Fo-menko chuan, "World cham-pion hneh turin hun ṭha kan nei a, kan hmang ṭangkai lo. Germany kan khelh ṭuma kan lantir phurna khan min la kalsan lo a, beiseina sang tak kan la nei a ni," tiin a sawi.

Poland tan Milik

Ajax star Arkadiusz Milik-a'n minute 51-naah Northern Ireland lamah a pet goal a, a vawi khat nan Poland-in European Championship-ah hnehna an chang.

Poland hian hian 2008 leh 2012 khan European Championship hi an lo khel tawh a, match ruk khel tawhin chak nei loin an tla nghal ve ve. Tun ṭumah hian qualifier-a goal khung tam ber Robert Lewandowski chu an star a ni a, match hmasa bera team chakna erawh Milik a ni.

Kum 22-a upa Milik hi feet ruk leh inches 2.5-a sang a ni a, season liam ta khan Ajax tan goal 24 a khung. Northern Ireland an khelh ṭum hian Jakub Blaszczykowski siam chu goal-ah a chantir a, Michael O'Neill hote te tan buaina a siam nual bawk.

Northern Ireland erawhin goal khungna hun ṭha an nei lo a, inelna lian tham an khelh hnuhnung parukah chak an nei lo.

Hmabak

Ningani zan dar 12:30 hian qualifier-a lo inhmachhawn tawh leh match hmasa bera chak nghal Germany leh Poland an inkhel ang a, hemi zan dar 9:30 hian Ukraine leh Northern Ireland te an inkhel ve bawk ang.