Formula 1 A zawnin Hamilton a chak

Lewis Hamilton chuan tun season-a a vawi khat nan intlansiak pahnihah a zawnin hneh-na a chang ve ta. Pa-thianni khan Canadian Grand Prix-ah pakhatna a ni a, he hmunah bik hian ṭum nga hnehna a channa chiah a ni.

Kum 31-a upa Hamilton hi Formula 1 world champion lai ni mah se season hmasa tawp lam leh kuminah beisei angin a tlan ṭha tawk lo a, thla sarih ngawt chakni hmel a hmuh loh hnuah thla hmasa khan Monaco-ah hnehna a chang ve leh ta a, Canada-ah hian Ferrari driver Sebastian Vettel hnehin pakhatna dinhmun a luah. Williams driver Valtteri Bottas chu pathumna a ni thung.

Season tir intlansiak palia hnehna chang vektu Nico Rosberg chu pangnaah a thleng a, Mercedes driver Rosberg hian point 116 hmuin driver championship-ah hmahruaitu la ni mah se a teammate Hamilton nen hian point kua chiahin an inthlau tawh.

World champion vawi thum lo ni tawh British driver Hamilton hian a hnehna chan chu boxer ropui thi ta Muhammad Ali tan a hlan a ni.