Euro 2016 Ronaldo hoa inlan tur Portugal
Zanin dar 12:30-ah Portugal-in Euro 2016-a an match hmasa ber an khel dawn a, an hmachhawn tur hi a vawi khat nana European Championship-a inlan tur Iceland an ni.
Group B inkhel dangah Aus-tria leh Hungary an inhmachhawn dawn bawk a, ram langsar ni lo pahnih hi zanin dar 9:30-ah an inkhel ang.
Tun hnai dinhmun
Portugal-in Euro 2016 khel tura an in pet tlin hnuah friendly match pasarih an khel a, vawi li hnehna changin vawi thum a tlawm zawkah an ṭang. Fernando Santos kaihhruaina hnuaia khel Portugal hian Luxembourg (2-0), Belgium (2-1), Norway (3-0), Estonia (7-0) lakah hnehna changin Russia (1-0), Bulgaria (1-0) leh England (1-0) lakah an tlawm thung a, an team hneh zingah Belgium chiah hi team ṭha huanga tel an nih avangin Iceland lakah insiamṭhat an tum dawn.
Iceland-in an match hnu-hnung parukah vawi hnih chiah hnehna an chang a, vawi li an tlawm. Iceland hian Finland (1-0) leh Greece (3-2) lakah hnehna chang mah se UAE (2-1), USA (3-2), Denmark (2-1), Norway (3-2) lakah an tlawm a, inelna lian thama an match hmasa berah Portugal an hneh thei a nih chuan in barakhaihna ropui zingah chhiar tel a ni ang.
Tute nge khel dawn?
Portugal-in an squad-ah player inhliam an nei lo a - hei hi Iceland tan chanchin hriat nuam a ni hauh lo ang. Portugal captain Cristiano Ronaldo thiamzia hi sawi nawn a ngai lo - Real Madrid forward hi Iceland tlarhnung tan buaipui tham a ni ang.
Kum 32-a upa Ricardo Qua-resma chu tar tawh lamah a parvul leh mek a, Besiktas winger hian kumin bikah ram tan match nga khelin goal thum a khung a - a goal khungte hi player naran tana tih theih loh vek a ni.
Portugal tlarhnunga Pepe leh Bruno Alves inkawp tur hi Euro 2016-a tlarhnung player zinga tawnhriat ngah ber pawl an ni - Iceland tlarhma tan anni tawn tlang tum hi a hautak dawn.
Iceland lamah Swansea midfielder Gylfi Sigurdsson hi an innghahna tur a ni dawn a, Tottenham Hotspur tan pawha lo khel tawh midfielder hi freekick pet thiam bik a ni a, Portugal defender tan goal hlauhawm china freekick chawi loh dan ngaihtuah a fin thlak ang.
Kum 37-a upa Eidur Gud-johnsen chu Iceland squad-ah a awm bawk a, Chelsea leh Barcelona tan pawha lo inlan tawh forward hi Iceland player zinga khawvel hriat hlawh ber pawl ni mah se a kum a tam tawh avangin inkhel bul a ṭan a rinawm loh - tunah hian Norwegian club Molde tan a khel mek.
Austria vs Hungary
Zanin dar 9:30-a inhma-chhawn tur Austria leh Hungary-ah Bayern Munich left back David Alaba-te ram Austria hi chak tura beisei zawk an ni.
Austria-in tlarhnung lamah pla-yers an neih ṭhat avangin David Alaba hi dan pangngaiin midfield-ah a khelh rin a ni a, Werder Bremen midfielder Zlatko Junuzovic hi a freekick pet thiam vanga lar a nih avangin Hungary tlarhnung tan ngaihthah a thiang lo ang.
Season hman zawh taka Stoke City tana goal 12 khungtu Marko Arnautovic leh Swiss Super League club FC Basel tan league match 17 a khelha goal 16 khungtu Marc Janko-te hi Hungary tlarhnung chhaih mangang turin an ṭha tawk.
Hungary tan captain Balazs Dzsudzsak bawk innghahna a ni leh dawn a, Turkish club Bursaspor winger hi Hungary tan vawi 78 inlana goal 18 khung thei a ni - mah se Austria hian tlarhnunga ding turin Dynamo Kiev centre-back Aleksandar Drago-vic, VfB Stuttgart defender Florian Klein, Leicester City left back Christian Fuchs leh Watford defender Sebastian Prodl te an nei a, paltlang an harsa ang.
Kum 40-a upa Hungary goal-keeper Gabor Kiraly hi a inlan thei a nih chuan European Championship-a inlan thei player upa ber a ni dawn tihna a ni.