A ṭul chuan gold medal ka dah let ang - Bolt

Khawvela tlan chak ber Usain Bolt chuan a ṭul a nih chuan Olympic gold medal a kawl lai chu a dah let hreh loh tur thu a sawi.

2008 Beijing Olym-pic-ah khan Jamaican relay team chu 4x100m-ah pakhatna an ni a, Bolt bakah hian Nesta Carter, Michael Frater leh Asafa Powell te an tlan ho a, second 37.10 chhunga tlan thlengin world record an siam hial.

Tunah hian an zinga mi Carter chuan khang hunlai khan damdawi hman phal loh a hmang niin sawi a awm a, a result tih chian la ni chiah lo mah se a hmang ngei nia sawi a tam hle. A lo hmang a nih chuan gold medal an dawn tawh hi laklet sak theih an ni ang.

Kum 29-a upa Bolt chuan, "Kan chanchin hi a lawmawm loh hle, kum li chhung rim taka kan thawh rah chu dah let a ngai a nih chuan a lungchhiat thlak hle ang. Medal kan dawn sa hi a ṭul a nih chuan kan dah let ang," tiin a sawi.

100m leh 200m-a world record chelh mektu Bolt hi Olympic atan a inbuatsaih leh mek a, kartawp khan Jamaica National Racers Grand Prix-ah inlanin second 9.88 chhungin 100m a tlan thleng a kumina a tlan ṭhat ber ṭum a ni.