Luis Suarez a insawifiah

Kar liam ta Zirtawpni zing khan Uruguay-in Venezuela goal khatin an hneh lo a, Copa America Centenario-ah beisei tur an nei tawh lo. Tukin zing khan Uruguay-in Jamaica an hmachhawn a, result awmze nei tawh lo inkhelah hian Suarez hi a inlan lo.

Uruguay-in match pawimawh taka Vene-zuela an hneh loh ṭum hian Barcelona forward Luis Suarez chu squad-ah telh a ni lo a, khelmual sirah luh lo thinrim tih hriat takin a bib hak lai leh ball boot te chu a paih bakah coach Oscar Tabarez lakah ṭawngkam mawi lo a hmang niin a lang bawk.

Khelmual chhunga chanchin ṭha lo lam ngah ve tak Suarez chuan, "Insawifiah ka duh a, a chhan chu ka chanchin an sawi tam tak hi thudik tawk lo a ni. Inkhel tur-in 90% pawhin ka fit tawk lo a, ka khel thei lo tih inhre reng mah ila chhawr theih turin ka awm. Amaherawhchu ka dinhmun hrechiangtu coach chungah ka lawm hle, min khelh luihtir se chuan tun aia nasa hian ka inhliam thei a ni. Tihrawl na hi hriatthiam har tak a ni a, dam angin inhre mah ila han khelh meuh chuan na hi a rawn chhuak leh mai ṭhin," tiin inkhel tura a fit tawh loh thu a sawi.

Barcelona forward Suarez chuan sawi chhun-zawmin, "Ramin min mammawh em em laia engmah ti thei loa ka awm kha hreawm ka ti em em a, khelh ka duh mah ila coach thutlukna kha ka zah a ṭul a ni. Uruguay tan hian ka theihna zawng zawng ka chhuah ṭhin a, min khelhtir se chuan ka theihtawp ka chhuah dawn. Ka khelh loh chhan hi Barcelona lamin an phal loh vang a ni lo a, ka la dam ṭhat loh vang a ni," a ti.

Kum 29-a upa Suarez hian coach Tabarez chung-ah a chetdan vanga ngaihdam a diltu a sawi bawk.