New Zealand-in India an 'whitewash'

Nikum Cricket World Cup semfinal-ah India-in New Zealand an hneh lo a, Virat Kohli hote vanduaia ngai an tam. Amaherawhchu Kane Williamson-a hoten an ṭha tak tak tih lantirin Men in Blue hi ODI match thum an khelhah an hneh vek a, 3-0 in series an la.

Nimina ODI match thumna khelhah India-in bat hmasain run 296/7 an siam a, New Zealand hian ball 17 dah bangin run 300/5 an siam a, target an umpha. Kiwis leh India hian Test match vawi hnih an khel leh ang.

Bay Oval-ah New Zealand-in vawm hmasak an thlang a, India tan Mayank Agarwal (1 run) leh captain Kohli (9) te che ṭha lo mah se KL Rahul-a'n run 112 zet a siam.

Shreyas Iyer pawh ṭum dang ang thoin a rintlak a, run 62 a siam bakah Manish Pandey-a'n run 42 a siam. India hian run 296 an siam thei a, bowler chet ṭhat dan a zirin chak thei an ni.

New Zealand opener pahnih Martin Guptill leh Henry Nicholls ten India bowler chhuanvawr Jasprit Bumrah an pal dai a. Guptill-a'n run 66 siamin Nicholls-a'n run 80 a siam bawk avangin hna harsa ang lang chu a awlsam phah.

Tom Lantham (32) leh Colin de Grandhomme (38) ten an bul ṭan ṭhatna hi a tawp an thlenpui a, New Zealand-in over 47.1-ah hnehna an chang. Run 80 siamtu Henry Nicholls chu player of the match-ah thlan a ni a, player of the series-ah Ross Taylor thlan a ni thung.

Taylor hian ODI match thumnaah run 12 chauh siam mah se ODI hmasa berah thi loin run 109 a siam a, ODI match hnihnaah run 79 a siam bawk avangin an chakna kawngah a ṭangkai hle.