Cristiano Ronaldo a tlu hlen lo! Slovenia hnehin Portugal an tlang

Tluk leh chet fuh lo chang nei ve bawk ṭhin mah se, a hunah tak Cristiano Ronaldo a tho chhuak leh ṭhin. Portugal captain hian mawhphurhna sang la ngamin an ram a chakpui a, mittui nen Euro 2024 quarterfinal an lut.

Portugal leh Slovenia ten goal an khung lo a, extra time khelh zawh hnuah pawh goal a lut lo. Penalty shootout hmanga chak zawk zawn niin, Portugal tana pettu Ronaldo, Bruno Fernandes leh Bernardo Silva ten an khung vek; Goalkeeper Diogo Costa chuan Slovenia lam pet dansak vekin, 3-0 in an chak.

Ronaldo leh a ṭhiante hian quarterfinal-ah chuan France an hmachhawn dawn. Kylian Mbappe awmna Les Bleus hian last 16 inkhel dangah Belgium chu 1-0 in an hneh ve thung, football thiam ram pahnih hi July 5, Zirtawpni zanlaiah an intawng ang.

A goal lo

Mipui 58,000 lenna Frankfurt Arena-a khat ṭha hle a, a vawi khat nana major tournament knockout stage kheltu Slovenia an phur; inkhel ṭan hma darkar hnih la awmah khan khelmual leh a chheh velah an khat vek tawh a, rimawi nen an lam ṭan hma hle.

Portugal chu a hlauhawm zawk an ni - Rafael Leao leh Ruben Dias ten an hlah hnuah Ronaldo chuan Bernardo Silva-a cross a khawih phak lo a, keeper ṭha Jan Oblak-a'n a lo dan bakah Ronaldo-a freekick chu goal ban hrulah kawh zetin a liam.

Inkhel a hmuhnawm a, ram pahnihten a tawp thlengin beiseina an nei. A vawr tawp thlen hun erawh extra time khelh laiin a ni thung. Portugal lamin penalty hlawh chhuakin a pet turin Ronaldo a rawn ding chhuak, khung ni se chak tlang theihna remchang ṭha lutuk a ni.

Mahse, tawnhriat ngah Ronaldo hian inringtawk taka a penalty pet chu goalkeeper Oblak chuan a lo dansak. Tla tura indah hman Slovenia lam chu lawm avangin an zuang a, penalty hlahtu Ronaldo chuan mittui nen hun a hmang thung.

Slovenia hmatawng Benjamin Sesko-a'n defender Pepe tihsual nangchingin ball a la lut a, box bul thlenga tlan puiin a duh tawkin a pet thei. Amaherawhchu, si ban nghaktu Costa lo tlan chhuakin a goal shot hi a lo dansak, goal lut loin inkhel a tawp.

Penalty chu

Tla an awm a ngai si - penalty hmangin quarterfinal lut tur zawk chinfel a ngai. Slovenia tan Josip Ilicic a rawn ding chhuak hmasa ber a, na takin goal kil lamah pet mah se Costa chuan zuan fuhin a lo dansak hman tlat!

Portugal tan hmahruai theihna remchang a inhawng a, chutihrualin hlah palh erawh chu 'Dem Rawn' nih theihna a ni thung. Player tam tak tan penchhuah a huphurhawm ang, he hunah hian Ronaldo lo dingin chiang lutuk maiin a khung.

Goalkeeper Costa a inringtawk laklawh, a hmasa ber ang bawkin Jure Balkovec leh Benjamin Verbic te petna lam turah a zuang dik chat a, European Championship penalty shootout-a vawi thum dang thei hmasa ber a ni hial.

Fernandes leh Manchester City midfielder Silva te tan erawh khung turin harsatna a awm lo a, chiang takin an khung. Penalty hlah vanga Ronaldo mittui tla chu hun tawpah lawmna mittuiin a thlak a, hun rei lote chhungin boruak a inthlak chiang hle.

Player of the Match atana thlan Costa chuan, "Extra time khelh laia Seso khung tur ka dansak khan nasa takin inrintawkna min siamsak a, an taksa chet dan ka zir thiam theih phah bawk, football ka khelh tawh china ka match ṭha ber a la ni," tiin a sawi.

Player Inlan:

Portugal:
Diogo Costa;
Joao Cancelo (Nelson Semedo 118),
Ruben Dias,
Pepe (Ruben Neves 118),
Nuno Mendes;
Bruno Fernandes,
Joao Palhinha,
Vitinha (Diogo Jota 65);
Bernardo Silva, Ronaldo,
Rafael Leao (Francisco Conceicao 76).

Slovenia:
Oblak; Karnicnik, Drkusic, Bijol, Balkovec; Stojanovic (Verbic 86), Gnezda Cerin,
Elšnik (Ilicic 116), Mlakar (G Stankovic 75);
Sporar (Celar 75), Sesko.