Ronaldo zunzam

Cristiano Ronaldo hi kum 39 mi a ni tawh a, a tan European Championship hnuhnung ber a ni tawh. Player ropui bik hian champion tura duhsaktu a ngah a, Mizoram aṭang ngei pawhin Ronaldo leh Portugal inkhel entu an ṭhahnem.

Penalty-ah vanduai zawk ni se la chuan Ronaldo tawrhpuina leh chhaih nawmnahna thuin khawvel chanchinbu a luah khat hneh leh hle ang, a chunga mawhphurhna tla hlen chhuaktu Portugal captain chuan, "A tira ṭahna kha a tawpah lawmnaah a chang.

"Football hian lungngaihna leh hlimna min thlen ṭhin, mi chak leh ropuite pawh hian chet fuh loh chang an nei thei ve tho. Team-in min mamawh lai taka hun ṭha ka bawhpelh avang khan ka rilru a hrehawm hman takzet a ni.

"A tawpa a pawimawh ber erawh chak a ni a, hnehna kan chan hi kan lawm tur a ni. Kan team khan kan khel ṭha hle a, chak phu zawk kan ni," a ti a, an khingpuite chuan tharum an ngah bakah goal an ven thiam thu a sawi bawk.

Portugal coach Roberto Martínez chuan, "Mawhphurna a la ngam a, team tana ṭha tur a ngaihtuah bawk. Hringnun leh football hian hun harsa paltlang dan min zirtir ṭhin, kan captain hian chu chu a takin a rawn tilang a ni," tiin Ronaldo chungchang a sawi.