Champion lai Alcaraz a chak

Wimbledon mipa champion lai Carlos Alcaraz chuan match hmasa berah fiahna a hmachhawn nghal a, qualifying hmanga in vaw tling Mark Lajal chu 7-6 (3), 7-5, 6-2 a hnehin second round a inhlangkai.

Grass court inelna lian ber hi Thawhṭan tlai khan khelh ṭan niin, seeded pathumna Alcaraz hian Centre Court-ah bul a ṭan a, a khingpui Lajal tan Grand Slam main draw hmasa ber ni mah se a khel ṭha pangngai hle.

Spanish tlangval Alcaraz chuan, "Centre Court hi chu tennis ka khelh tawhna hmun zinga nuam ber a ni a, inelna neih hma khan minute 45 chhung ka training a, a chhan chu he hmuna inkhelh dawn hi chuan hlauhthawn hi a na ṭhin.

"Lajal khan min barakhaih hle, a chhan chu a inkhel leh training lai ka la hmu tam lo a, theihna sang tak a nei tih ka hria, tun aia sang leh ṭha zawk pawh a la thlen ngei ka ring," tiin a sawi.

French Open a champion hnuah Alcaraz hian Wimbledon title lak zui a tum dawn, a match lehpekah chuan Aleksandar Vukic a hmachhawn ang - Vukic hian Sebastian Ofner nen set nga an khelh hnuah hnehna a lo chang ve thung a ni.

Inkhel dangah Jannik Sinner pawh awlsam takin a chak mai bik lo. World number 1 Sinner hian Yannick Hanfmann lakah set khat a hloh, mahse Court One-a inkhelah Italian star hian German player hi 6-3, 6-4, 3-6, 6-3 in a hneh ta tho.

Australian Open champion Sinner-a'n a ball vuak na leh service ṭha tak a chhawrṭangkai a, grass-ah ball kal a rangin a kawh ṭhin, round sang zawka Matteo Berrettini a hmachhawn hunah pawh a ṭangkai zual tura ngaih a ni.

Kum 22 mi Sinner tan grass court hi hmun nuam leh ṭha ber a ni hran lo. Chutihrualin, Wimbledon inbuatsaih nan hian Halle Open-ah a champion thei a, a grass awmdan inang chiah lo mah se a kalhmang a danglam tam lo, inrintawkna sang tak a neih theih phah.

Mipa singles inkhel dangah Frances Tiafoe chu ropui takin a tho chhuak - American tlangval hian Matteo Arnaldi lakah set hmasa pahnih a hloh hmasa, mahse inkhel a tawp meuh chuan 6-7 (5-7), 2-6, 6-1, 6-3, 6-3 in a chak zawkah a ṭang.

Season hmasa semifinalist, kumina seeded pangana ni bawk Daniil Medvedev pawh a chak. Russian tlangval hian Aleksandar Kovacevic chu 6-3, 6-4, 6-2 in a hneh, player langsar dang - Casper Ruud, Grigor Dimitrov leh Tommy Paul te pawhin second round an lut ve bawk.