France-in Belgium an thawn haw

European Championship 2024 round of 16 inkhel ngaihven hlawh bera chhal ngam chu Thawhṭanni zan khan khelh a ni a, France chuan team ṭha Belgium chu 1-0 a hnehin quarterfinal an lut.

Team pahnihin chak an duh a, mahse, mipui beisei anga inkhel hmuhnawm erawh chhawpsak kan ni lo - inkhela goal awmchhun hi Jan Vertonghen khung a ni a, anmahni lamah a ni thung!

Hun tawp nan minute nga chiah a awm tawh tihah Randal Kolo Muani shot chu Belgian defender hian an lamah a tilut a, 1-0 in France an ngam lo - Les Bleus hian quarterfinal-ah Portugal an tawng dawn.

Belgium erawh puanthuah tela an haw a ṭul ta a, 'golden generation' tia an chhalten nomawi chawi loin an ram jersey an thlah dawn niin a lang - "Khami ṭum kha chu aw..." tiin an la thlirlet ve fo ang.

Beisei phak lo

Euro 2024-a champion rin hlawh ber chungin France-in Germany an pan a, mahse, quarterfinal an luh thlengin beisei angin an la khel chhuak lo - match li an khelh tawhah goal thum chiah an la khung a, open play aṭangin an la khung miah lo!

France goal khung pahnih hi 'own goal' a ni a, goal khat hi penalty aṭanga Kylian Mbappe chhuih luh a ni. Belgium lakah pawh France an hriam tawk lo a, kan beisei angin ennawm hmuhnawm min chhawpsak thei lo - an bil tlat.

Les Bleus tan captain Kylian Mbappe meuh pawh eng ruai a ang lo a, hmaikawr vuah chunga inkhel striker hian hmaikawr vuah nuam a tih loh thu a lo sawi tawh a, a takin min hmuhtir.

Real Madrid striker thar hian second half-ah ṭha zeta ball a lakluh hnuin goal-ah a chantir thei lo a, khelmual chhungah a hlauhawm ngaiin hlauhawm mah se, a hmawr a bawk thei bik tlat lo kha France buaina a ni.

A tawpah vanneihna

France tan Mbappe hmuh tur a awm leh zeuh ṭhin. Mahse, ṭha taka ball a lakluh hnua Aurélien Tchouaméni tana a siamsakte pawh Real tana a khelhpui tur midfielder hian goal-ah a chantir thei lo a, uiawm a tling.

Inter Milan forward Marcus Thuram chu goal hmaah a hriam tawk lo a, uiawm takin hnai set sawtah a tauh over. Didier Deschamps-a'n minute 62-naah Thuram hi la chhuakin Kolo Muani a dah lut a, a tisual lo chiang hle.

Minute 85-naah Muani hian a chance neih chu a insiamrem hnuah goal-ah a pet a, Jan Vertonghen-a khup perin, goal-ah a lut - Belgian keeper Koen Casteels tan tih theih a awm lo a, ball kal dan chhut fuh theih a ni lo.

Kum 38 mi Belgium coach Domenico Tedesco-a'n si phurh sut a duh a, Charles De Ketelaere leh Dodi Lukebakio luhtir zui mah se, goal an hlawh chhuak thei bik lo a, 1-0 a tlawmin Euro chu an mangṭha.

A pawi zo ta

France khelh dan ngawr ngawr en chuan chak an phu lo a, chutihrual chuan an khingpui Belgium khan chak an phu lo lehzual - beisei ang inkhel hmuhnawm min chhawp thei lo a, France thin han tih phut zawk ang kha an nei tam lo!

Romelu Lukaku-a'n tun inelnaah goal a khung ta miah lo a, Chelsea striker hian group stage-ah goal thum khung mah se, pawmsak a ni lo vek - France lakah chance vawi khat chu a nei ve a, mahse, a khawhral.

Minute 90 chhung hun tam zawk chu Lukaku a bo, tiin a sawi theih a, ram tan match 119-ah goal 85 zet a khung tawh tih awih a harsa zawk hial! Manchester City forward Jérémy Doku pawh a kum a la nau deuh tih a lang a, a hmawr a bawk thiam ṭhin lo.

Hun tawp hnaih lamah Kevin de Bruyne-a'n chance duhawm bik a nei a, mahse, Manchester City thiampuipa hi a finishing a ṭha tawk lo - kha goal kha khung ngat se chuan quarterfinal-a kan hmuh tur hi France ni loin, Belgium an ni zawk hial ang.

Belgium hun a tawp?

'Golden Generation' hming lem meuh inpe a, Belgium ṭhat vanglai bera ngaih team chuan nomawi chawi loin football khawvel an thlah dawn niin a lang ta - Eden Hazard, Vincent Kompany,Thomas Vermaelen, Marouane Fellaini, Kevin Mirallas leh Mousa Dembele ten inkhelh an chawlhsan tawh.

Euro 2024-a hruai loh, coach Tedesco nen inhmu thiam lo anga sawi keeper Thibaut Courtois pawh kum 32 mi a ni tawh a, Napoli-a a vanglai hun hmangtu Dries Mertens pawh kum 37 a ni tawh a, ram tan a inlan a rinawm tawh lo.

Tlarhnung laia rinrawl Jan Vertonghen pawh kum 37 mi a nih tawh avangin major tournament dang a khelh a rinawm tawh lo a, Axel Witsel pawh kum 35 lai a ni ve ta - goal khung loa Euro 2024 mangṭhatu Lukaku hi kum 31 a ni tawh a, Kevin De Bruyne pawh kum 33 a ni ve ta.

Belgium-in tuna player langsar tia chhal tur an neihte pawh kum 30 an chuang tawh a, kum la naupang deuh zingah chuan Jérémy Doku tih loh chu han sawi vul tur an nei rih lo hle - European football-a team hmuhnawm pawl ni ṭhin hi, zawi muangin an herlian ṭan niin a lang.