Thutlukna ka la siam lo - KDB

Belgium-in 1-0 in France an hneh lo a, round of 16-ah Euro 2024 an mangṭha. World Cup 2018-a pathumna an nih hnuah Belgium hian major tournament-ah semifinal an la khel leh lo a, an record a ropui lo hle.

Euro 2024 an mangṭha rualin fans tam rak rilruah zawhna a lo piang nghal a, chu chu Belgium captain Kevin de Bruyne hian ram tana inkhelh a chawlhsan mai ang em, tih chu a ni.

KDB chuan hemi chungchang zawhna hi chhangin, "Ka chawlh dawn leh dawn loh sawi nan a la hma mah mah a, kan tlawm a, hengte pawh hi kan tuar dam ve phawt ang e.

"Season rei tak kan hmang a, tunah chuan chawlh hahdam phawt ka mamawh. Nipui zawhah thutlukna chu ka siam ang," a ti a, international football a chawlhsan dawn leh dawn loh chungchangah thutlukna a la siam thei lo.

KDB hian August 11, 2010 khan Finland chu friendly match-ah hmachhawnin, ram tana a match hmasa ber a khel a, ram tan match 105 khel tawhin, goal 28 a khung a, assist vawi 49 a nei tawh.

Mahse, kum 33 mi a ni ve tawh a, international football chawlhsan chungchanga zawhna a dawng pawh hi a awm lo hran lo. Hetihlai hian coach Domenico Tedesco erawhin a ruahmannaah a la telh a, World Cup 2026 an kal ho theih a la beisei.

Tedesco chuan, "KDB hian kan tana a pawimawhzia chu a hria a, a thil hriatsa a nih avangin ka ngaihdan a mamawh lo," a ti a, a player chu an kianga la awm zel tura a duh thu a sawi.