Khelo India athlete-ah Ṭhazuala thlang

Mizo badminton 'star' H. Lalṭhazuala chu Khelo India Athlete (Badminton discipline) ah thlan a ni a, Chanmari West rawlthar rual hian Indian shuttler hmabak nei êng pahnih Rushendra Tirupathi leh Pranauv Ram N.te pawh thlan an ni.

July 1, Thawhṭanni khan Khelo India Talent Development (KITD) department chuan thuchhuah siamin, Ṭhazuala hi Khelo India Athlete atana thlan a nih thu leh, Pullela Gopichand Badminton Academy-ah admit a nih thu an tarlang.

Khelo India Athlete tur hi Khelo India Talent Identification and Development Committee-in an thlang ṭhin a, mahse, hetah hian pawm an la ni mai lo. High Power Committee (HPC) in lo thlifim ve lehin, pawm tlaka an ngaihte chu an pawm chauh ṭhin a ni.

He ruahmanna hnuaia infiammi thlanchhuahte chu an chet ṭhat dan a zir leh an result a zirin, kum riat thleng Khelo India hian a enkawl thei a, kum khat atan cheng nuai nga thleng sponsorship-ah hian pek an ni ṭhin.

Mizoram Badminton Association (MBA) chuan thuchhuah siamin, Ṭhazuala thlen chin chu an lawmpui thu an sawi a, hmasawn zel tur leh, Mizoram bakah India ram tihmingṭhatu ni zel tura duhsakna an hlan thu an sawi bawk.

MBA Player of the Season ni lai Ṭhazuala hian nikum khan North East Zone Inter-State Badminton Championship 2023, Arunachal Pradesh-a neihah Under-19 Boy's singles inelnaah gold medal lain, MBA Official Championship 2023, Senior (Men's singles) leh Junior category (U19 Boy's singles) ah te a champion kawp thei!

Chengdu, China-a Badminton Asia Championship-ah India tan U17-ah inlanin, March 6-10, 2023-a neih Yonex German Junior, Berlin-a neihah khan men's singles-ah India ai a awh a, February 28 - March 3, 2023-a Haarlem, Netherlands-a neih Yonex Dutch Junior International 2024-ah khan U19 Men's singles a khel bawk.

Ṭhazuala hi Yonex Sunrise All India Sub Junior Under 15 & 17 Ranking Badminton Tournament, 2023-ah khan Boys' Singles-ah a champion a, All India Sub-Junior Ranking Badminton Tournament, February, 2023-a neihah khan a champion bawk.