A thlengtu USA an tla

Copa America 2024 khelh laiah a thlengtu United States chu group stage paltlang zo loin an tla. Nimin zing inkhel boruak sang takah USA hian Uruguay chu 1-0 in an ngam lo, goal awmchhun hi Mathias Olivera khung a ni.

Olivera hian freekick aṭanga ball kal an tauh per, goalkeeper Matthew Turner lo nem chhuah chu chang fuhin hnai tak aṭangin a khung a, goal dang a lut zui lo. World champion hmasa ber hian group match vawi thum an khelhah hnehna an chang vek.

US lamin an goal chhuah danah Olivera chu a offside ni ngeiah an ngai a, mahse video assistant referee (VAR) hman a nih hnuah goal atan pawm zui a ni. Christian Pulisic, Weston McKennie leh Tyler Adams ten sut turin remchang nei mah se an ti hlawhtling thei lo vek.

Referee Kevin Ortega thutlukna chungchangah USA an lawm lo, captain Pulisic nei phei chuan na takin an inṭawng khum a, inkhelh banah Pulisic hian chibai tumin kalchilh mah se Ortega hian a lo chibai duh lo.

US captain Christian Pulisic chuan, "Thil thleng zawng zawng kha sawi vek a ngai ka ti hran lo, chutihrualin thutlukna dik tawk lo tuartu nih chu a na ṭhin. Tournament ṭha tak leh hlawhtling tak a nih theih nan match enkawl leh thunun lamah hmasawn a ngai," a ti.

Group C inkhel dangah Panama chuan Bolivia 3-1 in an hneh a, an group aṭangin hmahruaitu Uruguay leh Panama ten quarterfinal a lut a, pathumna US leh point hmu lo Bolivia ten inelna an mangṭha.

Tukin hian Group D chinfel a ni ang, Brazil leh Colombia ten group hmahruaitu tur zawk an ti chiang dawn a ni. Copa America-ah hian Argentina, Canada, Venezuela, Ecuador, Uruguay leh Panama te chu a thiam zual pariat zingah an tel chiang tawh a ni.