Premier League club-in £245mtd hmang tling tawh!

Premier League club-in tun nipui bazarah ni li chhung lekin pound maktaduai 245 an hmang tawh a, January transfer pumpuia an sum hman aiin a tam tawh zawk.

Transfer bazara PL club-ten sum an chet tam tir chhan hi profit and sustainability rules (PSR) zawm an duh vang a ni. Transfer bazar hi August 30, Zirtawpniah tawp dawn chauh mah se June 30, Pathianni kha PSR-a en chhin tur a ni a, chuvangin 'unofficial transfer deadline day' hming an vuah.

PSR dan an zawm lo a nih chuan point paihsak theih a ni a, hei vang hian club tan dan hi namnul ngam chi a ni lo.

Club langsar

Tun nipui transfer bazar hi June 14, Zirtawpni khan hawn ṭan a ni a; Aston Villa, Everton, Chelsea leh Newcastle te an nung ṭha hle.

Villa hi May 31, Thawhṭannia an account dinhmun enfiah a nih khan pound maktaduai 119 an hloh a, dan bawhchhe lo turin an chet ran a ngai reng a ni.

Everton hi season liam ta khan dan pahnih bawhchhiat avangin point riat ngawt an paihsak. Chelsea erawh Todd Boehly-a'n kum 2023-a neitu nihna a chan hnuah pound tluklehdingawn khat chuang player lei nan an hmang tawh.

Blues-in player an leite hi contract rei tak an ziahpui zel a, PSR danin kum khat zel a en avangin sum hmang tam angin an lang lo. Thuthang awm danin Newcastle United-in June 29, Inrinni khan pound maktaduai 50 an la hloh a, point paih loh nan an chet ran a ṭul.

Transfer fel tawh

Villa leh Everton ten player an inleisak tawn a, Lewis Dobbin-a'n Villa Park panin Tim Iroegbunam-a'n Goodison Park a pan thung. Player pahnih hi £9mtd man vel ve ve an ni.

Villa hian Omari Kellyman chu Chelsea hnenah £19mtd-in an hralh a, kum hnih liam ta khan Derby aṭangin £600,000-in an la lut a, midfielder hian Villa tan match ruk a khel hman.

Chelsea defender Ian Maatsen pawhin £35mtd-in Villa a zawm a, ani hi season liam ta chawhnu lam khan Borussia Dortmund tan khelin UCL final-ah pawh a inlan. Douglas Luiz-a'n Villa aṭangin Juventus a pan a, a man hi £42.35mtd a ni.

Villa hian Juve aṭangin English winger Samuel Iling-Junior (Kum 20) leh Argentine midfielder Enzo Barrenechea (Kum 23) te chu £18.5mtd-in an la lut a, Luton aṭangin Ross Barkley chu £5mtd-in an la lut bawk.

Premier League kai thar Leicester City-in season liam ta khan PSR dan pakhat an bawhchhia a, mah se Premier League khel tura an inpettlin chiah khan dan hnuaiah an awm leh chiah. A chhan chu PL-ah sum hman theih chin a tam zawk vang a ni. Foxes hian an academy chhuak Kiernan Dewsbury-Hall chu Chelsea hnenah £30mtd-in an hralh a, an sum dinhmun a tih ṭhat phah ang.

Chelsea hian PL kaithar Ipswich hnenah Omari Hutchinson chu £20mtd-in an hralh a, Barcelona aṭangin forward Marc Guiu chu £5mtd-in an la lut thung. Newcastle pawhin winger Yankuba Minteh (Brighton £30mtd), Elliot Anderson (Nottingham Forest £35mtd) leh defender Lewis Hall (Chelsea £28mtd) te an hralh bawk.

PL kaithar Southampton-in English defender Taylor Harwood-Bellis chu Man City aṭangin £20mtd-in an la lut a, full-back Charlie Taylor chu Burnley aṭangin free transfer-in an la bawk. Brentford pawhin club recrod-in Club Bruges aṭangin Igor Thiago chu £30mtd-in an la lut.

June 30 pawimawh chhan?

Premier League financial year chu June 30, Pathianni khan a tawp ta chiah a, thuneitute hnenah club sum dinhmun an thehluh chuan PSR dan zawm a ṭul. PL club-ten kum thum chhungin £105mtd an hloh tling thiang lo.

Chutihrualin Pathianni a nih avangin transfer ṭhenkhat chu June 1, Thawhṭanniah tihchian theih chauh a ni. Club engemaw zatin player hralh an mamawh avangin kar liam ta khan £75mtd sum che vel a awm tawh.

Club academy player an hralh hian club-in hlawkna 100% an account-ah an dah lut thei a, a leitu lam tan chuan an leina kha an contract ziah rei zawngin an sem sawm leh thung. Chuvangin club pahnihin an academy player an inhralh tawn hian club sum dinhmun nasa takin a pui thei a ni.

PL club-ten PSR 'deadline' an ngaih pawimawh avangin season tharah hremna an pumpelh theih a rinawm a, chutihrualin an sum dinhmun hi puanzar a nih loh avangin an him vek em tih erawh hriat a la ni lo.