Wimbledon Raducanu a chak hram

Emma Raducanu chuan Wimbledon 2024 a match hmasa berah hna hautak a nei nghal, player langsar nei lem lo Renata Zarazua lakah 7-6 (7-0), 6-3 in a hnehna a chang hram.

Kum 21 mi Raducanu hian season hmasa khan hliam vangin Wimbledon hi a khel thei lo, grass court inelna lian bakah tournament khelh theih loh dang pawh a ngah, kuminah erawh hnehna nen a lo kir leh thei ta a ni.

US Open champion hlui Raducanu chuan, "Zep tur a awm lo, kan inkhelh lai khan ka hlauthawng hle. Kan inkhelh hma zan khan kan ram Eangland-in Euro an khel ka en a, a tuka inkhelh lehnghal chu a hautak," a ti.

Inkhel dangah Naomi Osaka pawh a chak - world number 1 hlui hian kum nga hnua a vawi khat nan Wimbledon a khel ve leh chauh a ni a, a match hmasaah Diane Parry chu 6-1, 1-6, 6-4 in a hneh.

Japanese star Osaka hian fa a neih avangin tennis a chawlhsan laikawk a, kuminah a lo kir lehin tun dinhmunah world number 113 a ni mek. Grand Slam vawi li champion tawh chuan, "Ka rai laia tournament ka en hmasak ber chu Wimbledon hi a ni.

"Tunah chuan ka fanu pawhin kum khat a lo tling ve dawn ta, ka chawlh leh tuna ka hun tawn inkar ka chhut a, ṭha taka ka inkhel ve leh thei mai hi a lawmawm hle," a ti a, second round-ah chuan seeded 19-na Emma Navarro a hmachhawn leh ang.