Serie A player pariatin hri kai

Italian Serie A chu season thar hmang turin an inpuahchah chho mek a, chawlh hmang zo player endik tawh zingah Covid-19 kai player pariat hmuhchhuah an ni tawh, taksa lama harsatna lian tham nei erawh an awm lo thung.

Season thar hi September 19 aṭanga khelh ṭan tura tih a ni. Hri kai hmuh chhuah thar hi Torino player pahnih leh Napoli player pakhat a ni a, a hmain AS Roma leh Cagliari player zingah coronavirus kai an awm tawh thu hi puan a ni tawh.

Hun rei tak chhung chu Italy-ah hian hri kai an tlahniam, tun hnaiah erawh hri kai hmuhchhuah an pung leh deuh. Ningani khan ram pumah kai thar mi 845 an awm, kumin May 16 hnua ni khata kai an hmuhchhuah tam ber ṭum a ni.

Season hmasa khan hripui leng vangin Serie A hi an lo buai chiam tawh, March 9 aṭanga an chawlh lailawk chu June 20 khan a hmuna entu awm loin an khel chhunzawm leh chiah - August 2 khan an zo thei hram.

Italian club zingah Inter Milan chuan season an la hmang rei fal bik, nizan khan Spanish club Sevilla nen Europa League final an khel a, result kan hre hman lo. Antonio Conte naute hian club dang aiin season thar inbuatsaihna hun an nei tlem bik dawn tihna a ni.