Hripui karah French Football Ligue 1 season thar an khel ṭan

France rama football inelna sang ber Ligue 1 season thar chu nizan khan khelh ṭan a ni a, zanin hian inkhel pahnih a awm leh nghal ang. Season hman laklawh laia European football bik la zawh loh avangin match an neih dan tur erawh duh ang thlap a ni nghal vek thei dawn lo.

Zanin hian Paris Saint-Germain chuan Champions League final-ah Bayern Munich an hmachhawn dawn. PSG hian an league match hmasa ber atan August 29, Inrinni zanah Lens an hmachhawn leh nghal dawn - fixture an siam danglam a nih loh chuan chawlhna hun an nei mumal dawn lo tihna a ni.

Season thar match hmasa ber chu Marseille leh Saint-Etienne ten nizana an khelh tur khan ruahman a ni. Mahse, player an endik zinga paliin Covid-19 an kai a ni tih hmuhchhuah a ni a, a hun pangngaiah an khel thei lo ang.

Team pahnih intawn hun atan hian September 16 emaw 17 emaw ruat lailawk a ni a, Tottenham manager hlui Andre Villas-Boas enkawl Marseille hi season hmasa khan pahnihna an ni, kuminah beisei an nei sang ang. Marseille hian an player duhlai Dimitri Payet chu contract thar an ziahpui, hun rei tak hliam vanga chawl tawh winger Florian Thauvin a dam tawh bawk avangin inrintawkna an nei dawn - champion tur erawh chuan vanneihna an mamawh tel dawn.

Arab sum hmanga siam len an nih hnuah PSG hian French football an thunun hneh viau, tun hnai season riat chhungin vawi sarih ngawt an champion - AS Monaco an inrawlh ve zeuh ti mai loh chu an champion char char.

Thomas Tuchel-a enkawl hi an che sual viau a nih ngawt loh chuan kuminah pawh champion tura rinkai ber an ni leh dawn. "PSG-in point engzat nge an hmuh? Point engzatin nge hma an hruai fal?" tih leh record thar engzat nge an siam tih chu zawhna awm leh tura ngaih a ni. Ligue 1-ah hian Marseille leh Saint-Etienne te chu vawi 10 champion tawhin record nei ṭha ber an ni a, nomawi vawi kua chawi tawh PSG hian club pahnih record nih rual theihna hun an neih dawn avangin season dang aiin an phur zawkin a rinawm.

2016–17 season champion AC Monaco hian season hmasa khan beisei an phak lo hle, tlak hlauhthawnawmah an awm fo a, manager Robert Moreno banin a hmunruak luah turin Niko Kovac an lalut thung.

Monaco hian season hnih chhung chhe taka an hman hnuah pathumna chin nih leh an tum dawn. Bayern Munich coach hlui Kovac-a' eng ang takin nge danglamna a thlen dawn tih chu hriat châkawm tak a ni.

Arsenal captain hlui Patrick Vieira enkawl Nice hi season hmasa khan pangana ni chungin hun tawp an hmang, league match khelh zawh loh 10 kha khel zo ta se an sang zawk mai thei - kuminah chuan Champions League khel phak zinga awm an tum ang.