Portugal vs France - Pakhat zawk an tla dawn!

World Cup 2006 a ni a, semifinal-ah France-in 1-0 in Portugal an hneh - hetihlai hian Cristiano Ronaldo chu Manchester United-a player beiseiawm tak chauh a la ni a, superstar rual kawltu Les Bleus tan Zinedine Zidane chuan penalty hmangin goal awmchhun a khung.

Portugal-in 'Golden Generation' tia an lo koh, an ram team ṭha ber ang hiala an chhal tawpna a ni a, nomawi chawi loin he 'golden generation' hi an thamral a, inelna thlengtu Germany nen pathumna nih inchuhin, hetihlaia Portugal player ropui ber ang hiala tam takin an ngaih Luís Figo chuan ram tan inkhelh a chawlhsan zui.

Euro 2016 a ni a, final a ni. Portugal-in thinlung na taka an 'golden generation' lo siam tawhtu France lakah phuba an la a, he inelnaah meuh chuan Ronaldo hi 'superstar' a ni tawh satliah lo a, Figo ropuina pawh chiang takin a khum tawh - Portugal hian 1-0 in hnehna an chang a, an hliamte chu tuam damin a awm ta.

Euro 2024 a ni a, quarterfinal a ni. Zanin dar 12:30 hian ram pahnih hi semifinal luh tumin an intawng leh dawn ta - France-in phuba lak let an châk a, Portugal-in hneh nawn an châk. Keini lam chuan menrei zanah kan puang leh mai e!

Beisei phak lo

Euro 2024-a champion rin kai zinga mi ve ve an ni a, mahse, tun inelna an hman tawh danah erawh inhmusit thei an awm lo - beisei an phak lo ve ve a, vannei takin quarterfinal hi an inbang liam ve hram, tiin a sawi theih.

Portugal hian group stage-ah Czech Republic (2-1) leh Turkey (3-0) chu harsatna nei loin hneh mah se, Euro-a FIFA ranking hniam ber Georgia chu 2-0 in an ngam lo zui a, round of 16-ah penalty hmangin team nem zawk Slovenia chu an pet chhuak ve hram.

Hetihrual hian France hi inchhuang thei an awm bik lo. An match hmasa berah Austria chu 'own goal' hmangin an hneh hram a, Netherlands lakah goal an khung lo a, Poland nen 1-1 a inhnehtawkin, goal hi penalty aṭanga Kylian Mbappe chhuih luh a ni!

Round of 16-ah pawh France hian inkhel hmuhnawm min la chhawpsak bik lo. Team ṭha Belgium chu 1-0 in hneh mah se, Jan Vertonghen-a 'own goal' an vanneihpui a, tun inelnaah open play aṭangin goal an la khung miah lo.

Team ṭha ve ve

Tun inelnaa team pahnih sulhnu a ropui lo a, chutihrual chuan inzuam ngawt chi a ni lo tih erawh an chiang ang - Portugal tan tlarhnungah Pepe hi kum 41 ni tawh mah se a la rintlak em em reng a, Rúben Dias nen ding dunin, mual sira thlawp turin João Cancelo leh Nuno Mendes an la awm dawn.

France goal khung zat leh Portugal tlarhnung thlirin, Les Bleus tan goal khung a huphurhawm a, a hmaikawr vuah vanga 100% hleithei lo Kylian Mbappé tan a theihna tak tak pholan a hun - Antoine Griezmann leh Ousmane Dembélé te pawhin mawhphurhna an nei tih an hriat a ṭul.

Defensive midfield-ah Palhinha leh Vitinha te an inkawp leh ngei a rinawm a, France tan erawh N'Golo Kanté chu an 'engine' tur a ni leh ang - a dinpui turin Aurélien Tchouaméni a awm dawn a, Portugal goal nawr tur dang chat turin an ṭha tawk.

Portugal hian tlarhmaah Ronaldo an maltlat tir leh ngei a rinawm a, Bernardo Silva, Bruno Fernandes leh Rafael Leão ten an thlawp thei ang - bench lamah João Félix leh Diogo Jota an la awm cheu bawk.

Danglam thei

Team pahnih khelh ṭhin dan thlirin squad siksawi lutuk a nih a rinawm lo a, chutihrual chuan vawi khat chak loh a pawi theih avangin coach pahnihin 'risk' an la lo ang tih a sawi theih loh.

France lamah Didier Deschamps-a formation rem danin thui tak a hril a rinawm a, ngei ngeia thlak ngai tur chu hrem vanga inlan thei lo Adrien Rabiot a ni - chuti a nih chuan France hi 4-3-3 aṭangin 4-2-3-1 a inthlak thei dinhmunah an ding.

He formation hi an hman chuan Mbappe a matlat ang a, Griezmann leh Dembele te chu a hnung aṭanga thlawp tur chiang an ni. Inter Milan foward Marcus Thuram erawh tun inelnaah beisei a phak lo a, Belgium laka bench aṭanga goal hlawh chhuaktu Randal Kolo Muani zawk hian bul a ṭan lo ang tih a sawi theih loh.

Portugal hian a harsa zawngin round of 16 an paltlang a, minute 120 zet an khelh hnuah penalty an pet. Portuguese player-te an chau ang tih a chiang a, Roberto Martinez-a'n Rafael Leao aiah Jota a luhtir a nih pawhin a mak lo ang - player dang a thlak danglam erawh rin a harsa.