A tawp nan Ronaldo?

Pangpar mawi ber pawhin chuai hun a nei a, thla êng mawi tak pawh zing khawvarin a thlah liam hun a thleng ṭhin - Cristiano Ronaldo meuh pawh a vul reng thei lo a, a inkhel kan en nin loh player hian zawi muangin football khawvel chu a thlah mek e.

Ronaldo hian Euro dang a khelh tawh loh tur thu a sawi chiang tawh a, kum 39 mi a nih ve tawh avangin Portuguese forward-in Euro a khelh tawh loh tur thu a sawi hi thil awm tak a ni - zanin hi a match tawp ber a ni thei!

Chutihrual chuan engtiklai pawha chak duha tuihal reng Ronaldo hian nomawi tel loa Euro mangṭha chu a ui ang tih a chiang a, France lakah goal khung a tum - tun inelnaah goal erawh a la khung lo.

Ronaldo hian vawi 20 zet shot nei tawhin goal a la khung miah lo a, Euro chanchinah ani aia shot nei tam chunga goal khung lo pali chiah an awm - he record duhawm lo hi thai chhiat a, France lakah hnehna hlado chham a châk dawn.

Portugal squad en ila, kil tinah player ṭha an ther fur. Hei vang hian tam tak chuan Ronaldo hi bench-ah dah ngam se, Portugal hian an ṭhatpui zawk an ring - bench lama Ronaldo dah ngamtu coach ni tur erawh chuan huaisen tawpkhawk a ngai ang!

Ronaldo kianga Portugal tana khel ṭhin, kum 40 mi centre back José Fonte chuan, "Mi tam takin Ronaldo hi Portugal tan buaina angin an sawi ṭhin a, ka nui tawp zel - thil awihawm loh, thawnthu phuahchawp mai a ni," a ti a, Ronaldo tel ngeina Portugal hmuh a la duh zawk.

Al Nassr forward Ronaldo hian ram tan match 211 zet khel tawhin, goal 130 a khung tawh a, assist vawi 47 a nei bawk. Euro leh UEFA Nations League-ah Portugal a champion pui tawh a, mimal chawimawina dawn theih ang zawng zawng dawng tawhtu forward hian Euro nomawi dang hun belh a duh ang.