Ten Hag-a'n contract thar a ziak

Manchester United chuan Erik ten Hag-a contract neih lai chu kum khat atan an pawtsei a, Dutch manager hian Old Trafford-ah kum 2026 thleng daih contract a ziak.

Kum hnih liam ta khan Ten Hag hian Ajax aṭangin Manchester United hi a zawm a, season hnih chhungin League Cup leh FA Cup-ah a champion pui.

Kum 54 mi Ten Hag chuan, "Inremna kan nei thei hi ka lawm. Kum hnih chhunga nomawi pahnih kan la thei hi ka lawm a, hmasawnna hmuh tur a awm bawk. Chutihrualin hmasawnna tur ṭhahnem tak a la awm," tiin a sawi.

Season liam ta khan Manchester United hian match 38-ah point 60 chauh an hmu a, pariatnaa an awm bakah an goal khung zat aia an chhuah zat a tam avangin an goal difference pawh 'minus' (-1) a ni hial.

Ten Hag hi ban theih dinhmunah a ding a, club neitu thar Sir Jim Ratcliffe leh a hoten uluk taka an zir chian hnuah contract hi an pawtsei. Man United hian coaching staff pawh an thlak danglam dawn a, United striker hlui Ruud van Nistelrooy pawh a tel tawh dawn. Nistelrooy hian 2022-23 season khan PSV Eindhoven a enkawl a ni.