Zanin dar 9:30-ah Euro 2024 final tenau : Spain Vs Germany

Euro 2024 quarterfinal-ah champion rinkai Spain leh inelna thlengtu Germany an inhmachhawn dawn a, inelna hmang ṭha pahnih an nih avangin zanin dar 9:30-a inkhel tur hi 'final tenau' tia sawi theih a ni.

MHPArena, Stuttgart-ah football ngainatute mit a fu dawn a, Euro 2008 rematch hi hmaih phal chi a ni dawn lo. La Roja-in winger hmuhnawm pahnih Lamine Yamal leh Nico Williams te an kawl a, Die Mannschaft lamin rawlthar ṭha mi Jamal Musiala leh Florian Wirtz te an nei ve bawk.

Attacking football

Germany-in tun ṭum inelnaah goal 10 khung tawhin an la khung tam ber a, Spain-in goal kua an khung tawh. Team pahnihin attacking football an khel ve ve a, goal khung tam zawk nih an tum bakah ball chang tam zawk nih an tum ang.

Julian Nagelsmann-a naute hian 62% ball possession an nei a, Toni Kroos awmna team an nih avangin thilmak a ni lo. Chutihrualin tun hmaa Germany vanglai ang kha chu an ni tawh lo a, 'direct football' khel loin 'possession football' an khel tawh zawk.

Kroos hian vawi 435 pass a neihah vawi 416 a pass dik a, Euro 2024-a pass dik ngah ber niin inelna zawha football chawlhsan tur atan a uiawm hle. Chutihrualin Kroos hi Musiala leh Wirtz ten a thlawp ṭha a, hna ṭha taka a thawh theih nan Robert Andrich-a'n a veng ṭha bawk.

Luis de la Fuente hote hian 58.5% ball possession an nei a, Germany dawta ball chang tam ber an ni. La Roja hian Rodri an kawl a, Manchester City midfielder hian vawi 278 pass neiin vawi 261 a pass dik.

Rodri-a'n pass ngah tho mah se Kroos a phak loh viauna chhan chu De la Fuente hnuaia an khelh dan hmang vang a tih theih ang. La Roja hian Tiki Taka football an kalsan hret a, chutihrualin sir zawnga ball inpe ngawt loin hma zawngin ball an inpe tam a, hei vang hian ṭum dang angin pass an ngah tawk lo a, goal hmaah an hlauhawm thung.

Midfield battle

Spain leh Germany inkhel turah hian midfield battle hi a pawimawh ber tura ngaih a ni a, hei vang hian Nagelsmann-a'n starting eleven-ah Leroy Sane aiah Wirtz a koh kir a rinawm. Kroos, Andrich, Ilkay Gundogan, Musiala leh Wirtz te an awm a nih chuan mual laiah Germany dinhmun a ṭha thei ang.

Chutihrualin Spain hian 4-3-3 hmangin Pedri, Rodri leh Fabián Ruiz te an nei a, midfielder ball pass thiam pathum hi winger ṭha mi Yamal leh Williams ten an thlawp ṭhat avangin tawh an khirh dawn. A tawi zawngin player remtu coach an pawimawh dawn a, Nagelsmann leh De la Fuente te inbeihna tiin a sawi theih bawk.

A goal dawn

Goal khung tam pahnih an inkhel dawn a, goal luh a beiseiawm. Chutihrualin team pahnih tlarhnung a ṭha ve ve. Spain hian goal khat chauh an la chhuah a, Germany-in goal hnih chauh an chhuah thung.

La Roja captain Alvaro Morata-a'n goal khat chauh la khung mah se a thlawptu pahnih Yamal leh Williams te an hmuhnawm a, Germany wing back Joshua Kimmich leh David Raum tan buaina tham an tling dawn.

Spain hian kil tin aṭangin goal an khung a, goal khungtu pasarih ngawt an kawl. Fabian Ruiz-a'n goal hnih a khung tawh. Chutihrualin inelna sang chinah chuan La Roja-in goal khungtu bik an nei lo hi an tuar thei bawk.

Germany tan player parukin an khung tawh a, Musiala-a'n goal thum khung tawhin a la khung tam ber. Chutihrualin Niclas Fullkrug-a'n minute 99 chauh khelin goal hnih a khung tawh a, Spain lakah erawh penalty aṭanga goal hnih khung tawhtu Kai Havertz bawkin bul a ṭan a rinawm zawk.

Bang rinawm

Spain hian tlarhnungah Aymeric Laporte kawppui turin Robin Le Normand an thlang a, Real Sociedad defender Le Normand hi ram tan match 15 chauh la khel mah se Real Madrid captain Nacho aia thlan a ni tih hriat a ṭha.

Mual sirah Dani Carvajal leh Marc Cucurella te an awm a, Bayer Leverkusen star player Alex Grimaldo chu bench-ah an dah thei. La Roja tlarhnung tiphui lehzual turin goalkeeper Unai Simon a awm. Athletic Bilbao goalkeeper Simon leh midfielder Rodri te an pawimawh ṭhin hle.

Germany-in group stage-ah tlarhnung ngai vek an hmang a, last 16-ah hrem vangin Jonathan Tah a khel thei lo a, Nico Schlotterbeck a rawn lut. Quarterfinal-ah Antonio Rudiger kawppui turin Tah a rawn let a rinawm a, left back Raum erawh bul a ṭan nawn a rinawm zawk. Right back-a awm Joshua Kimmich pawh Bayern Munich tan season chawhnu lamah right back hna a chelh char char tawh avangin, position thlak thut a ni lo a, a khel ṭha ṭhin hle.

Nagelsmann-a'n captain thlakin Manuel Neuer chungah mawhphurhna dah tawh lo mah se goalkeeper-ah erawh no. 1-ah a dah chhunzawm a, kum 38 mi Bayern keeper hi a la rintlak. Spain lakah pawh a ṭangkai leh ang.

Euro 2008 final rematch

Euro 2008 thlirkir chuan final-ah Germany leh Spain an inhmachhawn a, minute 33-naa Fernando Torres goal hmangin La Roja an chak. Spain hian goal an khung hma avangin goal mamawh Germany-in ball an chang tam zawk a, chutihrualin La Roja hian goal chance an ngah zawk.

Kum 16 liam ta final-a an inhmachhawnna kha Vienna a ni a, tun ṭumah erawh Germany-a kawppui pakhat Stuttgart a ni dawn. Nagelsmann-a hote hian an mualah phuba lak an tum ang.

Chutihrualin Spain-in Germany hi an hlau lo. Joselu chuan, "Toni hi ka hmangaih a, mahse Zirtawpni hi a match hnuhnung ber tur a ni," tiin Toni Kroos chu a duh aia hma hahdamtir an tum thu a sawi.