Osaka zinkawng a tawp leh ta

Naomi Osaka tan grass court season hi chu hun ṭha a ni theih mawlh lo - Wimbledon khelh laiah Emma Navarro hneh loin second round lekah a zinkawng a tawp leh ta a ni.

Nilaini zan inkhelah Osaka hi a che hleithei lo, minute 58 chhung lekin American nula Emma Navarro hi 6-4, 6-1 in a chak. Osaka tan Wimbledon title la tur chuan a rei lo berah thla 12 tal a nghah leh rih a ngai dawn.

Fa neih avangin Osaka hi thla 15 chhung a inkhel lo, a lo kir leh hnuah tun hma lama a ropuina ang kha a la nei let leh chiah lo bawk. Tunah chuan kumina Grand Slam hnuhnung ber tur US Open atan rilru a seng ṭan thei tawh ang.

Kum 26 mi Osaka chuan, "Ka khelh dan a nghet lo, inrintawkna ka nei sang loin a harsa ka ti hle. Ka khingpui khan a khel ṭha bawk a, tun ṭum chu ka tan hun ṭha a ni lo," tiin a sawi.

Inkhel dangah Coco Gauff erawhin harsatna a tawk lo, tleirawl Gauff hian qualifying aṭanga in vaw tling Anca Todoni chu darkar khat leh minute ruk chhung lekin 6-2, 6-1 in a hneh.

Gauff hian third round-ah chua tualchhung nula Sonay Kartal a tum leh dawn; Kartal hian tennis a khelh hun chhunga a chakna lian leh ropui ber ni turin Clara Burel chu a lo hneh ve bawk a ni.

Mipui ngaihven zinga mi Emma Raducanu pawhin Elise Mertens chu 6-1, 6-2 in a hneh a, a hliam a dam tawh tih chu tennis court chhungah a takin a lantir zel, a match lehpekah seeded pakuana Maria Sakkari nen an inkhel leh ang.

British tleirawl Raducanu hian kum 2021 khan khawvel barakhaihin US Open nomawi a chawi, a hnu lamah erawh hliam vangin a inkhel tam tawk lo a, hlawhtlinna lian dang a la chang leh lo hial a ni.

New York khawpuia hlawhtlinna a chan hnuah, tun ṭum hi Grand Slam bika third round a luh lehna hmasa ber a ni hial, kuminah hian tun hma lama thil mak a lo tih tawh ang kha anmahni ramah ngei thlentir a tum dawn a ni.