Ramfela a inhnukdawk

LPS Fight Night neih turah HC Lalramfela chu chhungkaw thil vangin a inhnukdawk a, Pro Fight champion lai panga zinga pathum an inlan dawn ta tihna a ni.

July 26, Zirtawpni zan khian LPS Arena, Falkland-ah 2023 Pro Fight boxer langsarte tan professional inhnek buatsaih a ni dawn bakah, Olympics thlir chungin Mizo boxer beiseiawm leh kum lama la naupangte tan hun ṭha siamsak an ni dawn.

Pro Fight weight hrang pangaa champion lai zingah flyweight title kawl mek NT Lalbiakkima'n tun hnaiah hliam a nei a, mimala a remchan loh bawk avangin a tira ruahmannaah a tel lo.

Lightweight champion Ramfela erawh Pro Fight final-a a hneh tak Cherhlun boxer C. Lalhruaitluanga nen inhnek nawn tura tih a ni a. Tihhlawhtlin ngei duh mah se eizawnna lama a buai vanglai a nih avangin a duh angin a inbuatsaih thei lo a, a rih deuh hlek hlawk bawk avangin tel ve lo mai turin thutlukna a siam a ni.

Khawvel huap professional boxing chhinchhiahna boxrec-ah inhnek pali ziah luh a ni dawn a. Boxrec-a lut ve lo turin flyweight huangah Melthum boxer Emmanuel Vanlalthlengliana leh Benjamin Laldindika an inhnek dawn a, kum naupang boxing zir mek aṭangin inhnek pakhat a awm tel ang.

LPS Promotion chuan Fight Night-ah hian mipui hmuh chak inhnek dang chhawpchhuah tel tumin hma a la mek bawk a, tun kar chhungin inhnek turte contract ziahtira tihfel hman vek a tum a ni.