Lakers an chak ve ta

Nimin zing NBA playoff inkhelah Los Angeles Lakers chuan Portland Trail Blazers 111-88 in an hneh, team pahnih hi Western Conference playoff series-ah 1-1 in an inhnehtawk mek - tlang tur chuan game liah hnehna chan a ngai.

Orlando, Florida-a inkhelah Lakers tan hian Anthony Davis a hmuhnawmin a thawhhlawk ber, American forward hian point 31 ngawt a nei. LeBron James pawh minute 27 a inlan chhungin point 10 a neih bakah assist vawi sarih a nei bawk.

Lakers hian 2012 Western Conference semifinal hnuah playoff an khelh ve leh chauh a ni a, star player LeBron James bakah Davis an neih avangin regular season-ah chuan Western Conference hmahruaitu an ni; playoff-ah pawh match hmasa berah che sual mah se champion tura rinkai an ni.

Blazers tan Damian Lillard chu a kut zungṭang hliam vangin minute 30 bak a inlan thei lo. A hliam hi na lutuk loa ngaih a ni a, Pathianni zing dar 6:00-a game 3 an khelh hunah chuan a inlan leh theih ngei an beisei. Eastern Conference playoff lamah game 1-a che fuh tawk lo Milwaukee Bucks an tho chhuak. Bucks hian Orlando Magic 111-96 in an hneh a, best of seven series-ah 1-1 in an inhnehtawk chiah.

Season hmasa MVP Giannis Antetokounmpo a hmuhnawm leh hle, Bucks star hian point 20 a neih bakah rebounds ṭum 20 ngawt a la a, inkhel ti hmuhnawmtu a nih bakah hnehna an chan theih nana tha thawhhlawk ber a ni.

Inkhel dangah James Harden awmna Houston Rockets chuan Oklahoma City Thunder chu 111-98 in an hneh, game hnih an khelh tawhah an chak ve ve avangin tlang turin an dinhmun a ṭha thawkhat tawh hle. Miami Heat pawhin game 1 lama an hneh tawh Indiana Pacers 109-100  in an hneh nawn. Zanin dar 1:00 hian game 3 an khel chhunzawm dawn a, team ṭha zawk Miami Heat bawkin harsa lutuk loin hnehna an chawng nawn tura ngaih a ni.