Khuarei a chang ta - England tan nomawi chawi a hun!

England tan nomawi sawi dawn apianga World Cup 1966 sawi ngai ziah hi a lungchhiatthlak a, black & white khawvela kir ngai leh ṭhin hi fans tam tak tan a 'na' - heti taka football inti neitu leh ngainatu ramin nomawi an chawi hleithei lo hi a hmeh pawh a inhmeh lo.

Kuminah fan-ten beiseina sang tak nen England an thlir a, 'Golden Generation' hun lai ang em kha chu ni lo mah se, Harry Kane, Jude Bellingham, Phil Foden, Kyle Walker leh Declan Rice te neitu ram mipuiten an team laka beiseina an nei sang hi a awm lo hran lo a, an tihawm zawk tak a ni.

Chutiang taka beiseina sang keng chung chuan England-in zanin dar 9:30-ah Euro 2024 quarterfinal an khel dawn a, an hmachhawn tur chu Switzerland a ni - Swiss team hi an hming aṭang ringawt chuan huphurhawmin lang lo mah se, zuam chi erawh an ni lo.

Xherdan Shaqiri telna ram ang leka hriat hlawh ṭhin Swiss team hian player ṭha tak tak an kawl nual tawh a, round of 16-a champion lai Italy pet chhuaktu an ni - England an chung en bik hauh lo ang tih a chiang.

Hello Three Lions

Euro 2024-a champion tura beisei zingah England an tel a, khelmuala an che velin thawnthu dang min hrilh thung - quarterfinal hial thleng tawh mah se, an theihna ang takin Three Lions an la khel chhuak lo a, an la hmuhnawm tawk lo.

England hian group stage match thumah vawi khat chiah hnehna an chang a, Serbia (1-0) an hneh hnuah, Denmark (1-1) leh Slovenia (0-0) an inhnehtawkpui a, round of 16-ah minute 120 inkhelin an chak hram.

Three Lions hian Slovakia chu 2-1 in an hneh a, mahse, hun pek belh minute nganaah Jude Bellingham chuan si phurh a sut ve chauh - tla hman teuh tak an ni! 'Three Lions' hming lem meuh neitu leh an result a inhmeh lo a, insiamṭhat an mamawh.

Mi tam takin England final kalkawng hi awlsam angin ngai mah se, quarterfinal chinah game a awlsam thei lo a, Switzerland an tum dawn bawk - Swiss team hian Hungary (3-1) an hneh hnuah Scotland (1-1) inhnehtawkpui mah se, Germany (1-1) leh Italy (2-0) laka an result avangin an inringtawk ang.

Boruak a ṭha

England hian an media chak luat an tuar zo lo anga sawi a awm fo a, a dikna chen a awm - player chhuak thar an neihin hahipin an fak a, an beisei an phak loh lahin an dim lo. Hetiang boruak sang hi player leh coach tam tak tan phurh zawh a har fo.

Euro 2024-a English media-te dem rawn hlawh ber chu Gareth Southgate a ni a, dem awmna chen pawh a awm. Mahse, Southgate demna kara thil lo lang chiang tak chu team boruak a ṭha, tih hi a ni a, a player-ten English coach hi an chhan hle.

Premier League Player of the Season ni lai Phil Foden chuan, "Player pawhin mawhphurhna kan nei ve. Kan khelh ṭhat tawk loh chhan hre thei tur player, hruaitu ṭha kan mamawh - manager chuan ruahmanna a siam a, tih dan tur min hrilh a, chutianga kan tithei lo a nih chuan keimahni lamin a tihdan kan ngaihtuah a ngai," a ti.

John Stones pawhin Southgate hi chhanin, "Manager theihna nei sang tak a ni a, a thil duhah a chiangin a fiah em em zel," a ti a, an coach chuan an sawiselnate chu amah tichaktu atana a hman thu a sawi bawk - Southgate tan England coach anga match 100 a hmachhawnna tur a ni a, hriatreng tlak result hnutchhiah a châk khawp ang.

Thawnthu hlui

Switzerland-in major trophy an la chawi ngai lo a, semifinal takngial pawh an la khel ngai lo. World Cup bika an record ṭha ber chu 1954-a quarterfinal an thlen kha a ni a, Euro-ah erawh a zawnin vawi thum chu last 16 aia hniamah an awm ngai lo.

A vawi khat nan quarterfinal a zawnin an lut a, a vawi khat nana semifinal khelh leh an duh ang. Mahse, an hmachhawn tur England laka an thawnthu hi a ropui lo hle - vawi 18 an inhmachhawn tawhah Swiss team hian vawi khat chiah hnehna an chang!

England hian vawi 12 hnehna changin, vawi nga an in draw a, March, 2022 kha an intawn hnuhnung ber niin, friendly match-ah England hian 2-1 in hnehna an chang - Swiss tan zaninah thawnthu hlui her danglam a châkawm dawn.

Three Lions hian Gareth Southgate hnuaiah major tournament pali khel tawhin, quarterfinal an la lut vek a, a record a chhe lo - tunah erawh nomawi chawi an duh tawh a, Euro 2020 finalist hian nomawi nen England-a haw an duh avangin Swiss team lakah an inthlahdah dawn lo.

'Slovakia nen kan inkhelh hmaa kan rilru paukhauh ang kha kan neih a ṭul a, hnehna chang tur chuan engpawh tih ngai se, kan inpeih tur a ni a, a tawpkhawk thlenga beih a ngai a nih pawhin chutiang tur chuan kan inpeih mai tur a ni.'
- Gareth Southgate, England manager.

'England hian kum thum liam taa final an luh dan an la hre rengin ka ring a, an ṭhatzia leh player an neih ṭhatzia pawh an inhria ang. Kan game khelh fo kan khelh a, kan khingpui hrawl tak tihbeidawn a hun leh ta - eng pawh thleng thei a ni a, vanneihnain kan lam a ṭan leh ka beisei.'
- Murat Yakin, Switzerland manager.