Xhaka - Switzerland innghahna bulpui chu!

Switzerland-in tun inelnaah 3-4-2-1 chu an formation hman lar ber a ni a, an player langsar ber chu Granit Xhaka a ni - Arsenal player hlui, Bayer Leverkusen-a season duhawm tak hmangtu hi, a tawi zawnga sawi chuan Swiss team tana a solfa vaitu a ni!

Swiss team tan si ban nghaktu Yann Sommer hi Inter Milan keeper a ni a, Borussia Monchengladbach leh Bayern Munich tan pawha lo khel tawh niin, Bayern leh Inter-ah a zawnin league nomawi a chawi - England keeper Jordan Pickford aia thlang zawktu an awm nual ang.

Murat Yakin-a enkawl Switzerland hian 3-4-2-1 tho an hmang lehin a rinawm a, chuti a nih chuan tlarhnungah Newcastle United centre back Fabian Schar, Manchester City defender Manuel Akanji leh Torino left back Ricardo Rodriguez te an inkawp leh ang - England tlarhma tan zuam ngawt chi an ni lo.

Bologna defensive midfielder Michel Aebischer leh Mainz 05 right back Silvan Widmer te chu wing back hna chelh turin an awm dawn a, midfield-ah an thiampuipa Xhaka leh Bologna midfielder Remo Freuler te an inkawp leh ang - anni pahnih hi an inkawp fuh rih cher cher hle.

A bik takin Xhaka chu en bik tur a ni leh dawn a, Leverkusen midfielder hi England-in an dang chat thei a nih chuan team inremkhawm fuh leh discipline ṭha tak Switzerland hi dan chah theih dan an awm.

Mahse, Xhaka-a'n tournament a hmang fuh rem rem hle. Hungary laka an chak ṭumin player of the match atan thlan a ni a, Italy lakah a dawng leh bawk - Euro pumpuiah a vawi nga dawnna niin, vawi ruk dawng tawh Andres Iniesta leh Cristiano Ronaldo te chiah a phak lo.

Xhaka game a hmuhnawm ṭhin a, a bik takin Italy laka a khelh dan phei chu pui tak a ni - vawi 101 ngawt ball tawk fuhin, khelmualah ani aia ball tawk fuh hnem an awm lo. Vawi 98 pass chhuah neiin, heng zinga vawi 94 hi a tidik a, a ball pass vawi 25 chuan Italy 'line' a ṭhiat thei.

Kum 31 mi Xhaka hian Leverkusen a zawm chu a ṭhatpui bawk. Mikel Arteta hnuaiah Xhaka hi box-to-box No.8 angin a khel tlangpui a, tlarhma lamah a tal tam. Xabi Alonso-a'n number 6-ah hmangin, Leverkusen game solfa vaitu ang deuhthaw a ni hial a, hei hi Swiss team-ah a chhunzawm a, a tifuh.

Alonso chuan, "Germany a lo kal khan, 'He hmunah hian midang hliahkhuhna hnuaia awm turin ka lo kal lo a, midangte entawn tura lokal ka ni' tiin min hrilh," a ti a, a rilru a paukhauh a, a puitling lehzual tawh bawk.

Xhaka chuan, "Hetah hian kan la tawp mai dawn loa hriatna ka nei tlat a ni," tiin quarterfinal an luh zawh khan a sawi a, chumi tur chuan amah chauha a khelh ṭhat a tawk lo - tlarhmaah AS Monaco forward Breel Embolo a hriam a ṭul a, amah thlawptu Augsburg winger Ruben Vargas leh Bologna forward Dan Ndoye te an chet ṭhat a ṭul bawk.