England khelh dan thlak danglam dawn?

Gareth Southgate-a'n 4-2-3-1 formation a hmang kumhlun a, mahse, zanin hian Switzerland lakah a team a khelhtir dan a thlak dawn niin khawthlang media-te chuan an tarlang.

Southgate-a'n training-naah formation hrang hrang a enchhin a, tlarhnunga player pathum dintir chu an training dan langsar a ni - English coach hian tlarhnungah player pathum dintir ta se, eng formation ber nge a hman ang, tih chu zawhna awm langsar a ni.

Eng vang nge?

Southgate-a'n centre back pathum chhawr a tum chhan hi Marc Guehi hrem a nih vang a ni pakhat a, Crystal Palace centre back hi zaninah a inlan thei dawn lo. Kieran Trippier-a'n hliam tenau neiin dam fel tawh mah se, chawlh hahdamtir a duh zawk niin a lang.

Chuti a nih chuan tlarhnung pathumah hian Manchester City defender pahnih John Stones leh Kyle Walker bakah, Aston Villa defender Ezri Konsa te chu lut tura beisei an ni a, 3-4-2-1 chu England tan hman theih a ni ang.

3-4-2-1 maw?

Southgate hian 3-4-2-1 a hman rinna tiliantu chu Jude Bellingham leh Phil Foden a ni a, player pahnih hian an theihna ang taka an la khelh chhuah loh avangin, Southgate-a'n bench a dah ngawt aia team tana an ṭangkai theih dan tur ngaihtuah a duh.

Chuti a nih chuan 3-4-2-1 hi player pahnih khelh theih dan tur a ni dawn - tlarhmaah Harry Kane a mal tlat ang a, a hnung chiahah a laia tlan lut tura zalenna nei chungin Bellingham leh Foden an awm thei ang a, hei hian England inkhel a tihmuhnawm ve sawt thei a, tlarhma an huphurhawm sawt thei bawk.

Player dang

3-4-2-1 a nih chuan centre back pathum pui turin wing back pahnih an lut ang a, hetah tak hian England squad-a ball pet thiam ber Trent Alexander-Arnold tan 'chance' a awm thei ang - Slovakia lakah Bukayo Saka-a'n wing back hna a thawk ṭha viau bawk a, Trippier leh Eberechi Eze te pawh duhthlan tur an la awm bawk.

Midfield-ah Arsenal chhuanvawr Declan Rice chu khawih chet thiang lo tluk a ni a, Rice hian tu nge a kawp ang? tih erawh zawhna awm thei a ni - Kobbie Mainoo leh Conor Gallagher duhthlan tur an awm a, Slovakia laka a khelh dan enin Mainoo tan chance a ṭha zawk thei.

A chiang lo

England hian 3-4-2-1 hi an hmang ngei ngei ang tihna a ni lo a, centre back pathum hmana, formation hman theih langsarah 3-5-2 leh 3-4-3 pawh a la awm - 3-5-2 hi hmang ta se, tlarhmaah Kane kawppui turin Ivan Toney tan chance a awm thei ang.

Wing back-ah Arnold leh Saka awmin, midfield pathumah Bellingham chu striker hnung chiahah awmin, Rice-a'n tlarhnung a pui ang a, Bellingham pui turin Foden a awm thei bawk ang - engmah chiang a la awm lo a, England-in an ṭhat dan ber an la hmu chhuak lo lai hi a buaithlak lai ber chu a ni rih!