Emi Martinez awmna Argentina an chak
Lionel Messi-a'n penalty hlah mah se goalkeeper danglam Emi Martinez an nei miau a, Argentina si ban nghaktu hian penalty vawi hnih dangin an ram chu Copa America 2024 semifinal a hruai thleng.
Nimin zing quarterfinal inkhelah Argentina tana Lisandro Martinez tauh luh chu Ecuador lamin hun tawp dawnah Kevin Rodriguez hmangin an sut a, penalty shootout hmanga chak zawk zawnah world champion 4-2 in an vannei.
Inhnehtawk
Mipui 72,220 lenna NRG Stadium a khat hneh hle a, inkhel hmuhnawm en châka pung khawmte hian an duh ang an hmu ngeiin a rinawm bawk. Argentina captain Messi chu a hliam dam tawhin inkhel bul ṭantu zingah a tel.
Lionel Scaloni-a naute hian inkhel thunun zawk mah se goal khung an harsat ve tho, chawlhlawk hma erawh chuan goal an nei. Messi-a corner pet chu Alexis Mac Allister-a'n a lo tauh pial a, ball kal zel hi changtu nei lo Martinez-a'n a tauh lut.
Second half-ah Ecuador hian sut theihna remchang ṭha bik an nei, mahse Rodrigo De Paul-a handball vanga penalty an hmuh chu captain Enner Valencia-a'n a hlah. Keeper Martinez zuan lohna lama pet mah se goal ban a per.
Khel ṭha tawk lo mah se Argentina chu goal khat faia chak mai tur ni pawhin an lang hman. Amaherawhchu, hamrik hnuhnung rik hma lawkin Kevin Rodriguez chuan rawn tauh lut ve lehin 1-1 in inkhel a tawp, penalty pet a ngai.
A changtupa Martinez
Argentina lamin penalty an pet hmasa, captain Messi chu pet hmasa ber turin a rawn pen chhuak - Messi hian goal laiah a chip keuh (panenka) a, goalkeeper Alexander Domínguez chu goal sir lamah zuang daih mah se ball hin bar a per!
Ecuador tan penalty khung vek chuan Argentina hneha Copa 2024 semifinal luh theih a ni. Mahse, Martinez chuan a ding chhuak hmasa pahnih Angel Mena leh Alan Minda te pet a lo dansak a, boruak a inthlak leh nghal daih.
La Albiceleste tan Messi hnua pettu Julian Alvarez, Alexis Mac Allister, Gonzalo Mintiel leh Nicolas Otamendi ten khung vekin an tlang. Semifinal-ah chuan Canada leh Venezuela inkhela chak zawk an hmachhawn leh ang.
Argentina an lawm laiin Ecuador chak lo erawh a nghawng a na, inelna an mangṭha rual hian Ecuadorian Football Federation chuan an coach Felix Sanchez an mangṭha zui nghal, kum thum daih contract a la neih chu an titawp a ni.