Vini tel loa inlan tur Brazil

Copa America 2024 khelh laia team hmuhnawm thlang dawn ni ila Uruguay hi sawi hmaih a thiang lo ang, world champion hmasa ber hian Pathianni zing dar 6:30 hian Brazil nen quarterfinal an khel ang.

World champion vawi nga ni tawh Brazil hian hrem vangin an player pawimawh Vinicius Junior an chhawr thei dawn lo. Brazil coach Dorival Junior chuan Vini-a tel loa khelh an zir tih a sawi a, an player ṭha Neymar a awm loh bawk avangin tlarhma lam chu an ṭhat dan ber a ni dawn lo.

Barcelona forwarsd Raphinha-a'n Colombia lakah freekick a chhuih lut a, ani hi tun ṭumah pawh Brazil hmanraw hlauhawm a nih leh a rinawm. Real Madrid forward Rodrygo bakah rawlthar duhawm Endrick an la nei bawk a, zuam sual theih tur tak chu an la ni.

Uruguay hian player an nei ṭha - Liverpool striker Darwin Nunez chu tlarhma lamah a hmuhnawm ṭhin a, a chawmtu Real Madrid midfielder Federico Valverde an nei a, tlarhnungah Barcelona defender Ronald Araujo an nei bawk - Brazil hneh an tum ngam ang.

Pathianni zing lam dar 3:30 hian Colombia leh Panama te an inhmachhawn dawn bawk. James Rodríguez leh Luis Diaz te awmna ram hi tun hnaiah an khel ṭha tluang a, tun ṭumah pawh hian chak zawk tura rinkai an ni.