Netherlands an vannei, an hmachhawn tur Turkey 'kim lo'

Euro 2024 quarterfinal match hnuhnung ber chu zanin dar 12:30 hian Netherlands leh Austria ten Olympiastadion Berlin-ah an khel dawn. Oranje hi group stage-ah pathumna ni mah se last 16-a an hmachhawn chu knockout stage lut zinga team nem pawl Romania an ni a, quarterfinal-a an khingpui tur Turkey pawh an kim dawn lo - an vannei hle.

Demiral an hrem

Turkey hian quarterfinal lut turin group stage-a khel ṭha Austria chu 2-1 in an hneh a, Merih Demiral-a'n goal hnih a khung. Mahse, Austria an hneh ṭuma a chet dan avangin Demiral hi hrem a ni dawn a, midfielder pahnih Orkun Kokcu leh Ismail Yuksek te hrem an ni bawk. Austria hneh ṭuma bul ṭantu player pathum ngawtin Netherlands a hmachhawn thei dawn lo.

Kum 26 mi Demiral hi centre back a ni a, goal pawimawh khung mah se team tan a ṭangkaina tak chu goal venhim lamah a ni. Juventus leh Atalanta tana khel tawh Demiral hi Turkey tan channa a ni dawn.

Chutihrualin group stage match hmasa pahnihah Demiral hian bul a ṭan pha lo ve ve a, Portugal laka 3-0 a an tlawm zawh inkhel aṭangin bul a ṭan. Al Ahli defender Demiral-a bul ṭan ṭumah Czech leh Austria te an hneh a ni.

Oranje an ṭha zawk?

Turkey hi kim ṭhapin khel pawh ni se, Netherlands hi chak tura rinkai zawk an ni tho. Coach Ronald Koeman hi Netherlands-in Euro 1988 an champion ṭuma player pawimawh kha a ni a, champion dan kawng a hre ngei ang.

Koeman hian group stage-ah France nen inhnehtawkin Austria lakah tlawm mah se last 16-ah Romania hmachhawnin inkhel thununin an chak. Oranje tlarhnunga inkawp Virgil van Dijk leh Stefan de Vrij te bakah goalkeeper Bart Verbruggen te an la khel tluan vek. Mual sirah Nathan Ake leh Denzel Dumfries te awm bawkin, an rinawm hle.

Midfielder pahnih Tijjani Reijnders leh Jerdy Schouten te an thawkrim bawk nen, Netherlands-in Austria lakah goal thum chhuah mah se Romana lakah an clean sheet. Oranje bench-ah Micky van de Ven, Matthijs de Ligt leh Jeremie Frimpong te an dah thei a, an squad a chhah ṭha.

Tlarhma lamah Memphis Depay-a hriam tawk lo a, chutihrualin team tan a ṭangkai. Netherlands tan Cody Gakpo chu danglamna thlentu a ni a, Liverpool forward hian goal thum khung tawhin assist vawi khat a nei tawh bawk.

Xavi Simons-a'n Netherlands game a timawi a, bench aṭanga lut turin Donyell Malen leh Wout Weghorst te an awm a, Turkey lakah an buk a rit zawk. Goal mamawh dan a zirin Wout Weghorst, Donyell Malen, Brian Brobbey leh Joshua Zirkzee te an la lut thei. Chutihrualin Brobbey leh Zirkzee te hian hmabak nei eng mah se match li an khelh tawhah an la inlan loh avangin quarterfinal-ah an inlan thut a rinawm lo zawk.

Turkey ve thung

Turkey hian nomawi la chawi lo mah se World Cup 2002 leh Euro 2008-ah semifinal an lut a, tun ṭumah hian Demiral tel lo mah se semifinal beiseina sang tak an nei ang. Real Madrid midfielder Arda Guler hi kum 19 mi chauh ni mah se goal leh assist a nei der tawh. Euro inelnaah kum 20 hnuai lam goal leh assist nei kawp thei chu Wayne Rooney (4 goals, 1 assist) leh Cristiano Ronaldo (2 goals, 2 assists) te chauh an ni a, zaninah pawh Turkey rawlthar hi danglamna thlentu a ni thei ang.

Darkhorse tia chhal theih Turkey hian Austria an hneh theih nan goalkeeper Mert Gunok a che ṭha a, injury time-ah save danglam bik a nei. Hrem vangin Demiral khel thei lo mah se captain Hakan Calhanoglu a rawn let dawn a, midfield a phuisui sawt ang.

Kum 30 mi Calhanoglu chuan, "Netherlands hi team ṭha an ni a, a harsa dawn tih kan hria. Chutihrualin kan hneh tak, Austria pawh kha team ṭha tho an ni. Kan theihna zawng zawnga kan khelh phawt chuan hnehna kan chang thei ang," tiin chak a inbeisei thu a sawi.

Vincenzo Montella hnuaiah Turkey-in awmze neiin an khel a, Netherlands lakah pawh an team theihna hre chungin player-te hna a sem leh ang. Ronald Koeman-a hote hi chak chiang saa ngaih chi a ni lo.