Djokovic tan a awlsam vek lo

Novak Djokovic tan meuh pawh khup hliam dam hlim chung chuan Wimbledon khelh a harsa, second round chauh la ni mah se harsa takin a chak hram a, inelna a hautak chhunzawm dawn niin a lang.

Ningani zan Centre Court-a inkhelah Djokovic hi tun hma ang chu ni se chak awlsam tur a ni, mahse tualchhung tlangval hriat hlawh ni lem lo Jacob Fearnley nen an inkhel tawk viau, a tawpah erawh Novak hi 6-3, 6-4, 5-7, 7-5 in a chak.

Serbian star Djokovic hi French Open khelh hnuah a khup hliam zai a ni a, grass court inelna lian atan hian inbuatsaihna tournament pawh a khel lo, atan thil a awlsam lo ve bawk a ni.

Grand Slam vawi 24 champion tawh Djokovic chuan, "Jacob khan a khel ṭha hle mai a, khatiang tak a tennis a rawn khel chhuak thei kha ka lawmpui. Kan pahniha kan khelh dan chhut kha chuan set nga khel ni ila a mak lo ang," a ti.

Thla kua chauh a la liam hman, khatih lai kha chuan Jacob hi world ranking sang zual 1000 zingah a tel phak lo! Thla khat liamta lekah pawh khan 500-na a la ni phak chuang lo hial!

Nottingham lamah a che fuh a, hei hian a ranking ti sang deuhin tunah chuan world number 277 a ni - Wimbledon atan hian duhsak takin wildcard pek a ni, an duhsak ang ngeiin tennis hmuhnawm a chhawp chhuak.

Inkhel dangah Alexander Zverev erawhin harsatna lian tham a tawk lo. Seeded palina Zverev hian a khingpui Marcos Giron chu 6-2, 6-1, 6-4 a hnehin second round a paltlang a, third round-ah chuan Cameron Norrie a hmachhawn leh ang.

German star Zverev hi player ṭha zinga mi a ni a, mahse inelna lian Grand Slam huangah a la hlawhtling miah lo. Kum 27 mi ni tawhin atn hun ṭha a ni mek, a vawi khat nan major title a la beisei chhunzawm zel a ni.